भक्तबहादुर श्रेष्ठ : कम्युनिष्ट आन्दोलनका आदर्श नायक

सुमन नेपाली
भक्तबहादुर श्रेष्ठ नेपाली कम्युनिष्ट आन्दोलनको पर्यावाची नाम हो । निरंकुश पञ्चायती व्यवस्थाको दबदबा रहेको बेला उहाँ ‘शेरसिंह’ नामबाट क्रान्तिको पक्षमा लागे। उनी यस्तो व्यक्ति हुन्, जो जीवनको झण्डै ६ दशक लामो समय कम्युनिष्ट आन्दोलनमा विताए । माओवादी आन्दोलनलाई संकटकाल लगाएर टाउकाको मूल्य तोक्ने प्रतिक्रियावादीहरुको नजरमा उनी भयङ्कर आतंककारी हो । तर नेपाली गरिब जनताको मुक्ति चाहनेहरुको नजरमा कमरेड भक्तवहादुर श्रेष्ठ एक क्रान्तिकारी योद्धा हो । सिङ्गो कम्युनिष्ट आन्दोलनको आदर्श नायक हो ।
२०६८ साल पुष २७ गते उनको दिवंगत भयो । नेपालको कम्युनिष्ट आन्दोलन एवं महान जनयुद्धमा उनले खेलेको भूमिकाको सम्मान स्वरुप उनको नाममा “भक्तवहादुर स्मृति प्रतिष्ठान” निर्माण भयो । प्रतिष्ठानले उनको योगदान र जीवनीसंग सम्बन्धित विभिन्न पुस्तकहरु प्रकाशन गरेको छ । त्यही पुस्तकहरु मध्ये “भक्तवहादुर श्रेष्ठ विविध आयाम” स्मृति ग्रन्थ प्रकाशित भएको छ ।
ग्रन्थमा “मेरो जीवनका उकाली ओरालीहरु” शीर्षकमा उहाँको जन्मकालदेखि चौथो महाधिवेशन कालसम्म आफ्नै जीवनयात्राको वैचारिक वर्णन गरिएको छ भने कमरेड किरण, कमरेड मोहनविक्रम सिंह, कमरेड अनिल शर्मा, कमरेड गौरवको श्रेष्ठको वैचारिक जीवन पक्षसंग सम्बन्धित आलेखहरु रहेका छन् । डा. ऋषिराज बराल र डा. नन्दीश अधिकारीले उहाँको सिर्जनामाथि समालोचना गरेका छन् । त्यसैगरी उमाकान्त आचार्यले उहाँको समग्र जीवनी र व्यक्तित्वमाथि चर्चा गरेका छन् । पुस्तकमा उनकी छोरी प्रतिभा श्रेष्ठ, देवेन्द्र तिम्ला, पत्रकार प्रताप विष्टको संस्मरण रहेको छ भने पुस्तकको अन्त्यमा उनको जीवनसंग सम्बन्धित रङ्गीन फोटोहरु राखिएको छ ।
समग्रमा नेपाली क्रान्तिका वर्गदुश्मनका विरुद्ध सैद्धान्तिक र व्यवहारिक रुपमा लडेका कुशल राजनीतिक व्यक्तित्व कमरेड शेरसिंहको जीवन क्रान्तिकारीहरुका लागी वैचारिक प्रेरणा हो । पुस्तक पठनीय रहेको छ ।

पुस्तक : भक्तवहादुर श्रेष्ठ विविध आयाम

मूल्य : रु.४००।–

पृष्ठ  ः १७२
प्रकाशन : भक्तवहादुर स्मृति प्रतिष्ठान
साभार  : जनबाटो डट कम