प्रधानमन्त्री ओलीद्वारा मन्त्रीपरिषद गठन

३ फागुन, हेटौँडा । नवनियुक्त प्रधानमन्त्री केपी शर्मा ओलीले ३ सदस्यीय मन्त्रीपरिषद गठन गरेका छन् । नवनियुक्त प्रधानमन्त्री ओलीले एमालेका लालबाबु पण्डित र थममाया थापालाई मन्त्री बनाएका हुन् । पण्डितलाई जनसंख्या तथा वातावरण मन्त्रालय र थापालाई महिला तथा बालबालिका मन्त्रालयको जिम्मेवारी दिइएको छ । 
यसैबीच, नवनियुक्त जनसंख्या तथा वातावरण मन्त्री पण्डित र महिला तथा बालबालिका मन्त्री थापाले पनि राष्ट्रपति विद्या भण्डारीबाट राष्ट्रपति भवन सितल निवासमा पद तथा गोपनियताको सपथ लिएका छन् ।
सपथग्रहण समारोहमा उपराष्ट्रपति नन्दबहादुर पुन, नवनियुक्त प्रधानमन्त्री ओली, निवर्तमान प्रधानमन्त्री शेरबहादुर देउवा, प्रधानन्यायाधिश गोपालप्रसाद पराजुली, पूर्व प्रधानमन्त्रीहरु, संवैधानिक अंगका प्रमुखहरु, नेपालस्थित कूटनीतिक नियोगका प्रमुख, नेपाल सरकार उच्च पदस्थ कर्मचारीहरुको सहभागिता रहेको थियो । 
सत्ता साझेदार नेकपा माओवादी केन्द्रले भने पार्टी एकता टुंगोमा पु¥याएपछि मात्रै सरकारमा मन्त्रीहरु पठाउने जनाएको छ । सरकारमा एमालेबाट ७० र माओवादी केन्द्रबाट ३० प्रतिशत मन्त्रीहरु सहभागी हुने विषयमा भने २ दलबीच सहमति भईसकेको छ ।
यसअघि विहिबारै नवनियुक्त प्रधानमन्त्री केपी शर्मा ओलीले पद तथा गोपनियताको सपथ लिएक थिए । विहिबार अपरान्ह राष्ट्रपति भवन सितल निवासमा एक विशेष समारोहकाबीच राष्ट्रपति विद्या भण्डारीले प्रधानमन्त्री ओलीलाई पद तथा गोपनियताको सपथ गराएकी हुन् । 
राष्ट्रपति भण्डारीले विहिबार विहानै नेकपा एमालेका अध्यक्ष ओलीलाई प्रधानमन्त्रीमा नियुक्त गरेकी थिइन । राष्ट्रपति विद्या भण्डारीले संविधानको धारा ७६ को उपधारा २ बमोजिम ओलीलाई प्रधानमन्त्रीमा नियुक्त गरेकी हुन् । 
त्यसअघि ओलीलाई प्रधानमन्त्री नियुक्त गर्न एमाले र माओवादी केन्द्रले राष्ट्रपति समक्ष समर्थन पत्र पेश गरेका थिए ।