सरकारद्वारा खेलकुदमा घोषित पुरस्कार प्रदान

२३ पुस, हेटौंडा । नेपाल सरकारले विभिन्न अन्तर्राष्ट्रिय स्पर्धामा पदक विजेता खेलाडी, प्रशिक्षक र व्यवस्थापकलाई घोषित पुरस्कार प्रदान गरेको छ।
युवा तथा खेलकुद मन्त्रालयले मंगलबार प्रधानमन्त्री निवासमा खेलाडीलाई पुरस्कार वितरण गरेको हो। साफ महिला फुटबल, एसियाली कराँते र कावाबीच भलिबलमा पदक जित्न सफल खेलाडी तथा ती खेलका प्रशिक्षक र व्यवस्थापकलाई पुरस्कार प्रदान गरेको हो। सरकारको गत मंसिर २८ गतेको निर्णयबमोजिम उनीहरूलाई पुस्कार प्रदान गरेको जनाएको छ।
गत कात्तिक १ देखि १४ गतेसम्म काठमाडौँमा भएको साफ महिला च्याम्पियनसिपमा पदक विजेता अमृता जैसी र प्रीति राई, मुख्य प्रशिक्षक राजेन्द्र तामाङ र व्यवस्थापक वृन्दा देवान तथा चीनको हाइजाओमा गत असोज १देखि ७ गतेसम्म भएको २० औँ एसियाली कराँते च्याम्यियनसिपमा पदक विजेता एरिका गुरुङ, मुख्य प्रशिक्षक कुशल श्रेष्ठलगायत खेलाडीलाई प्रधानमन्त्री केपी शर्मा ओलीले पुरस्कार प्रदान गरेका थिए।
यसैगरी उनले गत साउन १७ देखि २० गतेसम्म भुटानको थिम्पुमा भएको काभाबीच महिला तथा पुरुष भलिबलका विजेता कमला पुन, मनिषकुमारी चौधरी, प्रशिक्षक रुपेशकुमार विष्टलाई पनि पुरस्कार प्रदान गरेका छन् ।