राक्सिराङ पुगेर मुख्यमन्त्री लामाले भने गाँजा खेतीलाई "बैध" गरिनुपर्छ

२५ पुस,हेटौँडा । बागमती प्रदेशका मुख्यमन्त्री बहादुर सिंह लामाले मकवानपुरको राक्सिराङ पुगेर संघीय सरकारले ऐन बनाएर गाँजा खेतीलाई बैध गरिनुपर्ने बताएका छन्। ।

राक्सिराङ गाउँपालिकाको १७ औ हिउँदे अधिवेशनलाई उदघाटन गर्न राक्सिराङको चैनपुर पुगेका मुख्यमन्त्री लामाले सरकारले कानुन निर्माण गरेर गाँजा खेती गर्ने वातावरण तयार गर्नुपर्ने बताएका हुन् । हिउँदे अधिवेशनलाई सम्बोधन क्रममा मुख्यमन्त्री लामाले नागरिकको आवश्यकता अनुसारको विकास र गुणस्तरिय सेवा सहज रुपमा प्रदान गर्नु अहिलेको वर्तमान आवश्यकता रहेको तर त्यसको लागि आन्तरिक समस्या र कानुनी अड्चन सुल्झ्याउनुपर्ने बताएका छन् । उनले सिमान्तकृत वर्गको नागरिकको जिवनस्तर सुधारका लागि प्रदेश सरकारले रणनीतिक योजना कार्यान्वयनमा ल्याउने बताएका छन् । उनले सम्बोधनका क्रममा चेपाङ समुदायको विकास र उत्थानका लागि संरक्षित क्षेत्र घोषणा गरि कार्यक्रम कार्यान्वयनको चरणमा बागमती प्रदेश सरकार रहेको  उदघोष गरेका छन्। उनले राक्सिराङ हुदै धादिङको आदिमघाट जोडिने बाटोलाई बहुबर्षीय योजनामा पार्न सरकार लाग्ने प्रतिवद्धता व्यक्त गरेका थिए ।

त्यसैगरी कार्यक्रममा बोल्दै मकवानपुर क्षेत्र नम्बर २ का प्रतिनिधिसभा सदस्य तथा नेकपा एमालेका प्रमुख सचेतक महेश बर्तौलाले स्थानीय तहले सिन्डिकेट लगाउदा संसदहरु जनताका विषयमा  जनप्रतिनिधिसंग जोडिन नसकेको आरोप लगाएका छन् । उनले स्थानीय तहका प्रमुख÷उपप्रमुखले संघ तथा प्रदेश सांसदसंग समन्वय गरेर अघि बढ्नु पर्ने बताएका छन् ।