विश्वमा एकताको नयाँ भावना ल्याउने ट्रम्पको दावी

८ माघ, हेटौंडा । अमेरिकाका नवनिर्वाचित ४७ औँ राष्ट्रपति डोनाल्ड ट्रम्पले शपथ लिएका छन् ।  ट्रम्पले सोमबार अमेरिकी संसद्को क्यापिटल हिलमा शपथ लिएका हुन् । उनलाई सर्वोच्च अदालतका प्रधानन्यायाधीश जोन रोबर्ट्सले शपथ गराएका थिए । राष्ट्रपति डोनाल्ड ट्रम्पले आफ्नो दोस्रो शपथ ग्रहण भाषणमा आफुमाथि गोलि प्रहारको घटनाबारे स्मरण गर्दै आफुलाई भगवानले अमेरिकालाई फेरि महान बनाउन बचाएको बताए ।
उनले आफ्नो भाषणमा भने "हामी अरु कुनै पनि राष्ट्र भन्दा फरक हुनेछौं, करुणा, साहस र विशिष्टताले भरिपूर्ण।" उनले अमेरिकी शक्तिले सबै युद्धहरू रोक्ने र  विश्वमा एकताको नयाँ भावना ल्याउने बताए । उनले भने-"अमेरिका फेरि सम्मानित र प्रशंसित हुनेछ, हामी समृद्ध हुनेछौं। हामी गर्विलो हुनेछौं, हामी बलियो हुनेछौं र हामी पहिले कहिल्यै नभएको जस्तो जित्नेछौं। हामी पराजित हुनेछैनौं। हामी धम्कीमा पर्नेछैनौं। हामी टुट्नेछैनौं र हामी असफल हुनेछैनौं।"
ट्रम्पले नागरिकहरूलाई अमेरिकाको नयाँ स्वर्णिम युग सिर्जना गर्न साहसिक रूपमा सपना देख्नको लागि आह्वान गरे ।
शपथ ग्रहण समारोहमा निवर्तमान राष्ट्रपति जो बाइडेन, पूर्वराष्ट्रपतिहरू, उपराष्ट्रपति, मनोनीत गरिएका मन्त्रीहरू तथा उच्चपदस्थ अधिकारीहरू उपस्थित थिए ।