हेटौँडामा विश्व साइकलयात्री शाह सम्मानित

५ फागुन, हेटौँडा । विश्व साइकल यात्री पुष्कर शाहलाई शनिबार हेटौँडामा सम्मान गरिएको छ । रेडियो थाहा संचार ९९.६ मेगाहर्जले आफ्नो दशौं बार्षिकोत्सवको अवसरमा शाहलाई सम्मान गरिएको हो । 
साइकलको माध्यमबाट नेपाललाई विश्वमा चिनाउन र स्वास्थ्यमा योगदान पु¥याएकोमा शाहलाई सम्मान गरेको रेडियोले जनाएको छ । रेडियोकी अध्यक्ष अस्मिता सुमार्गीले शाहलाई नगदसहित सम्मान गरेकी थिईन् । सम्मान ग्रहणपछि बोल्दै शाहले साइकल चलाउनु स्वास्थ्य र आर्थिक दुबै दृष्टिकोणले फाइदाजनक रहेको बताए । उनले साइकल चलाउँदा शारिरीक व्यायाम हुने भएकाले स्वास्थ्यका लागि फाइदा पुग्ने र सवारी साधन चलाउन आवश्यक पर्ने इन्धन बचाउँदा आर्थिक रुपमा देशलाई फाइदा हुने स्पष्ट पारे । उनले हरेक शहरका सडकमा साइकल ट्रयाक अनिवार्य गर्नुपर्ने उनको भनाई छ ।
हेटौँडा राईडर्स क्लबका अध्यक्ष विकास ताम्राकारको प्रमुख आतिथ्यतामा भएको कार्यक्रममा रेडियोका संचालक अरुणराज सुमार्गी, अंकिता सुमार्गी, स्टेशन म्यानेजर मणीराज गौतम लगायतको सहभागिता रहेको थियो । 
सम्मान अघि हेटौँडाका ३० जना साइकल चालकहरुले हेटौँडादेखि चुच्चेखोलासम्म साइकल यात्रा गरी पुनः रेडियो परिसरमा आईपुगेका थिए । चुच्चेखोलामा स्थानीयले विश्व साइकल यात्री शाहसहित अन्य साइकल यात्रीहरुलाई स्वागत गरेका थिए ।