विजयी शुरुवातसंगै मनाङ सेमिफाइनलमा

५ फागुन, हेटौँडा । हेटौँडामा शनिबारदेखि शुरु भएको टुबोर्ग हेटौँडा गोल्डकपमा मनाङ मरर्याङ्दीलेले विजयी शुरुवात गरेको छ । जितसंगै मनाङ सेमीफाइनलमा प्रवेश गरेको छ । 
सुमन भोम्जन खेलकुद प्रतिष्ठानको आयोजनामा वन विज्ञान अध्ययन संस्थानको खेल मैदानमा भएको उद्घाटन खेलमा विभागीय टिम एपिएफलाई मनाङ मस्र्याङ्दीले १–० ले पराजित गरेको हो । खेलको २८ औं मिनेटमा एपिएफका सुरज गुरुङले मनाङका भिक्टरलाई डि बक्स भित्र लडाएपछि मनाङले पेनाल्टिको अवसर पाएको थियो । मनाङका सुजल श्रेष्ठले पेनाल्टिलाई सदुपयोग गर्दै विजयी गोल गरे । खेलको म्याद अफ दि म्याच मनाङका अञ्जनका विष्ट घोषित हुँदै नगद ५ हजार रुपैँया प्राप्त गरे । 
फागुन १२ गतेसम्म संचालन हुने प्रतियोगितामा प्रथम हुने टिमले नगद ५ लाख र उपविजेता क्लबले नगद ३ लाख सहित शिल्ड, मेडल तथा प्रमाणपत्र प्राप्त गर्ने प्रतिष्ठानका अध्यक्ष भेष खड्गीले जानकारी दिए ।
प्रतियोगिताको सर्वोत्कृष्ट खेलाडीले नगद ५० हजार प्राप्त गर्नेछन भने उत्कृष्ट विधाका पाँच जनाले नगद १५ हजारको दरले पुरस्कार प्राप्त गर्ने आयोजकले जनाएको छ । प्रतियोगितामा ३ विभागीयसहित ८ टिमको सहभागिता छ ।
आइतबार आयोजक विजयी युथ क्लव र विभागीय टोली नेपाल पुलिस क्लवबीच प्रतिष्पर्धा हुनेछ ।