अछाममा किशोरी हत्या प्रकरण: यौन सम्पर्क अस्वीकार गर्दा हत्या, दुई जना पक्राउ

१९ माघ, मंगलसेन। अछामको ढकारी गाउँपालिका–८, पल्साँताका दुई किशोरी इशरा खड्का (१४) र सरस्वती खड्का (१५) को हत्या प्रकरणमा नयाँ खुलासा भएको छ । प्रहरी अनुसन्धानबाट यो हत्या शारीरिक सम्पर्कको प्रस्ताव अस्वीकार गरिएपछि भएको पाइएको हो ।

अछाम प्रहरीको अनुसन्धान प्रतिवेदन अनुसार किशोरीहरूको हत्यामा मायाको चिनो (चुन्नी) नदिएको र शारीरिक सम्पर्कको प्रस्ताव अस्वीकार गर्नु दुई मुख्य कारण रहेको छ ।

यस प्रकरणमा १५ र १७ वर्षका दुई बालकलाई पक्राउ गरिएको छ। बालक भएकाले उनीहरूको वास्तविक नाम सार्वजनिक नगरी क्रमशः "६९ मङ्गलसेन ७३" र "६९ मङ्गलसेन ७६" भनी सम्बोधन गरिएको डीएसपी ईश्वरीप्रसाद भण्डारीले जानकारी दिए।

अनुसन्धानका क्रममा इशरा "६९ मङ्गलसेन ७३" की र सरस्वती "६९ मङ्गलसेन ७६" की प्रेमिका रहेको खुलेको छ, जसलाई आरोपित बालकहरूले स्वीकार गरेका छन्। "६९ मङ्गलसेन ७६" ले सरस्वतीसँग मायाको चिनो स्वरूप चुन्नी मागेका थिए र उनले दिन नमानेपछि शारीरिक सम्पर्कको प्रस्ताव राखेका थिए। सरस्वतीले दुवै प्रस्ताव अस्वीकार गरेपछि विवाद उत्पन्न भएको र उनको ढुंगाले हानेर हत्या गरिएको थियो । घटनाबारे अन्यलाई जानकारी नदिन गरेको आग्रह अस्विकार गर्दा इशराको पनि हत्या भएको प्रहरीको निष्कर्ष रहेको छ।माघ ११ गते बाख्रा चराउन गएका दुई किशोरी घर नफर्किएको र खोजी गर्दा मृत फेला परेका थिए । घटना पश्चात उक्त घटना कृतिम बनाउनका लागि हत्याराले ईशराको शव व्यवस्थापन गरेका थिए।जिल्ला प्रहरी कार्यालय अछाम, नेपाल प्रहरीको केन्द्रीय अनुसन्धान ब्यूरो सीआईबी, सुदूरपश्चिम प्रदेश प्रहरी कार्यालय धनगढी र नेपाल प्रहरी प्रदेश कार्यालय महेन्द्रनगरको संयुक्त टोलीले घटनाको अनुसन्धान गरेको थियो। जिल्ला प्रहरी कार्यालय अछामले घटनाको शनिबार बिहान पत्रकार सम्मेलनको आयोजना गरि जानकारी गराइएको थियो।