विजय युथलाई हराउँदै पुलिस सेमिफाइनलमा

६ फागुन, हेटौँडा । नेपाल पुलिस क्लव हेटौँडामा जारी टुबोर्ग हेटौँडा गोल्डकपको सेमिफाइनलमा प्रवेश गरेको छ ।
सुमन भोम्जन खेलकुद प्रतिष्ठानको आयोजनामा वन विज्ञान अध्ययन संस्थानको खेल मैदानमा आइतबार भएको खेलमा विजय युथ क्लवलाई ३–० गोल अन्तरले पराजित गर्दै पुलिस सेमिफाइनल पुगेको हो । पुलिसका लागि खेलको ११ र ४० औं मिनेटमा अभिषेक रिजाल र ५९ औं मिनेटमा रवि पाश्वानले गोल गरे । शुरुदेखि नै दवाव झेलेको घरेलु टोलि विजय युथले राम्रो प्रर्दशन गर्न सकेन । खेलको ८१ मिनेटमा विजय युथका मनोज विष्टले पुलिसका प्रिलन तामाङलाई हातपात गरेपछि रातो कार्ड पाएर बाहिरिएसंगै विजय युथ १० खेलाडिमा खेल्न बाध्य भएको थियो । आइतबार खेलको म्याद अफ दि म्याच पुलिसका अभिषेक रिजाल घोषित हुँदै नगद ५ हजार रुपैँया प्राप्त गरे ।
फागुन १२ गतेसम्म संचालन हुने प्रतियोगितामा प्रथम हुने टिमले नगद ५ लाख र उपविजेता क्लबले नगद ३ लाख सहित शिल्ड, मेडल तथा प्रमाणपत्र प्राप्त गर्ने प्रतिष्ठानका अध्यक्ष भेष खड्गीले जानकारी दिए । प्रतियोगिताको सर्वोत्कृष्ट खेलाडीले नगद ५० हजार प्राप्त गर्नेछन भने उत्कृष्ट विधाका पाँच जनाले नगद १५ हजारको दरले पुरस्कार प्राप्त गर्ने आयोजकले जनाएको छ । प्रतियोगितामा ३ विभागीयसहित ८ टिमको सहभागिता छ ।