हेटौंडा सिमेन्टले २० वर्षदेखि बन्द रहेको रोप-वे बेच्यो

५ फागुन, हेटौंडा । सरकारी स्वामित्वमा रहेको हेटौँडा सिमेन्ट उद्योगले बिगत २० वर्षदेखि संचालनमा नरहेको रोप–वे  विक्रि गर्ने भएको छ ।
आर्थिक अभावको चपेटमा परेको करिब ५ महिनादेखि उत्पादन गर्न नसकेको उद्योगले बन्द अवस्थामा रहेको रोप–वे विक्रि गर्न लागेको हो ।उद्योग सञ्चालनका लागि आवश्यक आर्थिक स्रोत जुटाउन उद्योग प्रशासनले लामो समयदेखि संचालनमा नआएको रोप–वे बिक्रि गर्न लागेको हो। 
बाराको लिपनीमाल स्थित श्री पि.एस एण्ड सन्स इन्टरप्राइजेजलाई भ्याटसहित ४ करोड २५ लाख ६ हजार ८० रुपैयाँमा रोप–वे बिक्रि गर्न लागेको हो । रोप–वे बिक्रि गर्ने बिषयमा गत पुस ७ गते सम्झौता भएको उद्योगका सूचना अधिकारी हरेराम आचार्यले जानकारी दिएका छन्। तीन किस्तामा रकम पाउने र  पहिलो किस्ता वापतको १ करोड ४२ लाख ६८ हजार ६९४ रुपैयाँ समेत प्राप्त गरिसकेको जनाइएको छ ।
रोप–वे खरिदकर्ता कम्पनीले सम्झौताको ९ महिना भित्र रोप–वेको सम्पूर्ण संरचना उठाइसक्नुपर्ने सहमती भएको सूचना अधिकारी आचार्यले जानकारी दिएका छन्। 
यता उद्योगका माहाप्रवन्धक बशन्त कुमार पाण्डेले लामो समयदेखि बन्द भएर प्रयोगमा नआएकाले रोप–वे विक्रि गरेको जनाएका छन् । हेटौंडा ९ मा रहेको उद्योगको भिमफेदी गाउँपालि वडा नम्बर २ भैंसेखानी सम्म करिब ११ किलोमिटर लामो  रोप–वे छ। रोप-वे सिस्टमसँग जोडिएका रोप–वेका टावर, तार र बकेट लगाएतका फालमजन्य सामान बिक्रि गरिने छ। २०६१ सालबाट रोप-वे संचालनमा रहेको छैन् ।