नेकपा एमाले र माओवादी केन्द्रबीच ७ बुँदे सहमति

८ फागुन, हेटौँडा । लामो समयको वार्ता र छलफललाई निष्कर्षमा पुर्याउँदै एमाले र माओवादीविच पार्टी एकताका लागि सातबुँदे सहमति भएको छ ।
सोमबार साँझ बालुवाटारमा बसेको पार्टी एकता संयोजन समितिको बैठकले सातबुँदे सहमति गरेको हो । यसअघि एमाले र माओवादी केन्द्रका अध्यक्ष पुष्पकमल दाहाल प्रचण्डबीच पटक पटक वान टु वान छलफल भएको थियो ।
दुवै दलका शिर्ष नेतृत्वले हस्ताक्षकर गरको सहमति पत्रको पहिलो बुँदामा एकीकृत पार्टीको नाम ‘नेपाल कम्युनिष्ट पार्टी’ रहने उल्लेख गरिएको छ ।
यसैगरी, २ नम्बर बुँदामा पार्टीको निर्देशक सिद्घान्त माक्र्सवाद–लेनिनवाद रहने उल्लेख गरिएको छ भने ३ नम्बर बुँदामा एमालेले अबलम्वन गरेको ‘जनताको बहुदलीय जनवाद’ र माओवादी केन्द्रले अवलम्वन गरेको ‘माओवाद र २१ औं शताब्दीमा जनवाद’ सम्बन्धी विषयहरूमा विधिसम्मत छलफल गरी आवश्वयक परिमार्जन र विकास गर्न सकिने भनिएको छ ।
यस्तै ४ नम्बर बुँदामा एमालेले अपनाउँदै आएको ‘जनताको बहुदलिय जनवाद’ अन्तर्गत अवलम्बन गरेको शान्तिपूर्ण बहुदलीय प्रतिष्पर्धामार्फत आफ्ना श्रेष्ठता स्थापित गर्नेलगायतका मान्यता र शान्ति सम्झौता र त्यसपछिका लोकतान्त्रिक अभ्यासद्वारा माओवादी केन्द्रको पनि उक्त शान्तिपूर्ण बहुदलीय प्रतिष्पर्धामार्फत आफ्नो श्रेष्ठता स्थापित गर्दै समाजवादको आधार निमार्ण गर्ने लगायतका मान्यतामा समान धारणा रहेको कुरा स्पष्ट भएकै छ भनिएको छ ।
यसैगरी सहमति पत्रको ५ नम्बर बुँदामा उपरोक्त आधारमा टेकेर अन्तरिम राजनैतिक प्रतिवेदन एवं अन्तरिम विधान तयार पारी सोहीअनुसार एकीकृत पार्टी सञ्चालन गरिने जनायएको छ । ६ नम्बरमा बुँदामा महाधिवेशनसम्म पार्टीको मूल नेतृत्व र केन्द्रीय बैठकहरूको अध्यक्षता दुवै पार्टीका वर्तमान अध्यक्षद्वारा आलोपालो प्रणालीबाट गरिने छ । र सरकारको नेतृत्वमा समेत सोही आलोपालो प्रणाली अपनाइने छ भनिएको छ ।
र
सहमति पत्रको ७ नम्बर बुँदामा आगामी पार्टी महाधिवेशनलाई एकता महाधिवेशनका रूपमा समझदारीका साथ भव्य रूपले सम्पन्न गरिने उल्लेख छ ।
पार्टी एकीकरणका प्रारम्भिक आधार नाम दिइएको सातबुँदे सहमति पत्रमा एमालेबाट पार्टी अध्यक्ष तथा प्रधानमन्त्री केपी शर्मा ओली, झलनाथ खनाल, माधवकुमार नेपाल, वामदेव गौतम र ईश्वर पोखरेलले हस्ताक्षर गरेका छन् ।
यस्तै, माओवादी केन्द्रबाट पार्टी अध्यक्ष पुष्पकमल दाहाल प्रचण्ड, नारायणकाजी श्रेष्ठ र रामबहादुर थापाले हस्ताक्षर गरेका छन् ।