अन्तराष्ट्रिय आमन्त्रण इटहरी गोल्डकपको उपाधि मछिन्द्रलाई

११ फागुन, हेटौंडा । सुनसरीको इटहरीमा सम्पन्न १५ औँ अन्तराष्ट्रिय आमन्त्रण इटहरी गोल्डकपको उपाधि मछिन्द्र फुटबल क्लबले हात पारेको छ।
शनिबार इटहरी रंगशालामा सम्पन्न भएको फाइनलमा मोरङको सगरमाथा युथ क्लबलाई २-० गोलले पराजित गर्दै मच्छिन्द्रले उपाधि हात पारेको हो ।
मछिन्द्रलाई विजयी बनाउन विदेशी खेलाडी मलिक युसुफ र ओमुलाजा नुरैन हरिमले गोल गरेका थिए। खेलको चौथो मिनेटमा मलिक युसुफले गोल गर्दै टिमलाई अग्रता दिएका थिए।
पहिलो हाफमा १–० शून्यको अग्रता लिएको मछिन्द्रका हरिमले खेलको ८५ औँ मिनेटमा दोस्रो गोल गर्दै जित सुनिश्चित गरेका थिए।
प्रतियोगिताको सर्वोत्कृष्ट खेलाडी सगरमाथाका कुलदिप कार्की भए। त्यसैगरी, अन्य विधातर्फ मछिन्द्रका विशाल श्रेष्ठ उत्कृष्ट गोलरक्षक, सनिष श्रेष्ठ उत्कृष्ठ डिफेन्डर, विशाल घलान उत्कृष्ठ मिडफिल्डर घोषित भए।
यस्तै, मलिक युसुफ उत्कृष्ठ फरवार्ड, सन्तोष न्यौपाने उत्कृष्ठ प्रशिक्षक घोषित भए। त्यसैगरी उदयीमान खेलाडी आयोजक राष्ट्रिय जागृति क्लबका सविन घिमिरे भए।
मच्छिन्द्रले ट्रफीसहित १० लाख रुपैयाँ हात पारेको छ। त्यसैगरी उपविजेता सगरमाथाले ५ लाख रुपैयाँ हात पारेको छ।
गोल्डकपमा एक भारतीयसहित ८ टोलीको सहभागिता रहेको थियो ।