इन्द्रसरोवर घटना: प्रतिकारमा घाइते हुने आफ्नै छोरा, उपचारको क्रममा मृत्यु

१६ फागुन, हेटौंडा। मकवानपुरको इन्द्रसरोवरमा आँखामा खुर्सानीको धुलो छर्की चोरी गर्न एक घरमा पुगेका र सो घटनामा घरधनीको प्रतिकारमा गम्भीर घाइते भएका पुरुषको मृत्यु भएको छ भने मृतक व्यक्ति भ्लोन दम्पतीकै छोरा भएको पुष्टि भएको छ। 
बिहीबार राति इन्द्रसरोवर ३ अदुवा बारीमा स्थानीय मिन बहादुर भ्लोन र निजकी श्रीमती देवी माया भ्लोनलाई आँखामा खुर्सानीको धुलो छरी लुटपाट गर्न खोज्दा देवी मायाले घरेलु औजारले प्रतिकार गर्दा गम्भीर घाइते निज दम्पतीको जेठो सुपुत्र ३८ वर्षीय भरथ बहादुर भ्लोन भएको पहिचान खुलेको हो।

निज भ्लोनको  चितवन स्थित भरतपुर अस्पतालमा उपचारको क्रममा मृत्यु भएको मकवानपुर प्रहरी प्रवक्ता प्रहरी नायब उपरीक्षक श्यामु अर्यालले जनाएका छन् । पहिचान हुन नसकेको अवस्थामा निजका माइलो भाइले मृतकको पहिचान गरेको प्रवक्ता अर्यालले बताएका छन् ।

त्यसैगरी घटनामा घाईते भ्लोन दम्पतीलाई थप उपचारको लागि काठमाडौं पठाइएको जनाइएको छ। उनीहरुलाई निजका छोरी कुमारी भ्लोनले उपचारको लागि लगेको प्रवक्ता अर्यालले जनाएका छन्। घटनाको इलाका प्रहरी कार्यालय भिमफेदी र जिल्ला प्रहरी कार्यालय मकवानपुरको टोलीले आवश्यक अनुसन्धान गरिरहेको जनाइएको छ ।