भेट्रान्स कप: किङकम र फ्रिडम फाइटर फाइनल प्रवेश

२५ फागुन, हेटौंडा । हेटौडामा जारी दशौं राष्ट्रिय हेटौंडा भेट्रान्स कप एट ए साइड रनिङ शिल्ड फुटबल प्रतियोगिताको फाइनलमा फ्रिडम फाइटर भेट्रान्स र किङकम भेट्रान्स प्रवेश गरेका छन् । 
आइतबार हुप्राचौर खेलमैदानमा सम्पन्न सेमिफाइनलमा फ्रिडम फाइटर भेट्रान्सले बानेश्वर फ्रेण्डसिप भेट्रान्सलाई १-० गोल अन्तरमा पराजित गर्दै फाइनल प्रवेश गरेको हो भने किङकम भेट्रान्सले आयोजक हेटौंडा भेट्रान्स क्लबलाई ५-३ गोल अन्तरले फाइनल प्रवेश गरेको हो । 
खेलमा फ्रिडम भेट्रान्सको तर्फबाट खेलको छैठौं मिनेटमा कृष्ण मालाकारले गरेको एक मात्र गोल निर्णायक बनेको थियो । खेलमा म्यान अफ द म्याच गोलकर्ता मालाकार घोषित भएका थिए ।
यस्तै किङकम भेट्रान्सको तर्फबाट खेलको ७ औं मिनेटमा सरोज थापा र निरज सिंह बस्नेतले २८ औं मिनेटमा एक/एक गोल गरेका थिए भने किशोर नेपालीले १२ औं, ४२ औं र ४४ औं मिनेटमा तीन गोल गर्दै टिमलाई विजयी बनाएका थिए । हेटौंडा भेट्रान्सको तर्फबाट खेलको ३१ औं मिनेटमा प्रकाश महर्जनले एक गोल गरेका थिए भने दीपक लामाले ३७ औं र ४१ औं मिनेटमा दुई गोल गर्न सफल भएका थिए । खेलको म्यान अफ द म्याच किङकमका खेलाडी किशोर नेपाली घोषित भएका थिए । प्रतियोगिताको फाइनल खेल सोमबार दिउँसो २ बजे हुने प्रतियोगिता संयोजक मणिराज गौतमले बताए ।
प्रतियोगिताको मुख्य प्रायोजकका रूपमा हेटौँडा उपमहानगरपालिका रहेको छ भने सह प्रायोजकका रूपमा हेटौडा स्कुल अफ म्यानेजमेन्ट रहेको छ । प्रतियोगितामा पहिलो हुने समूहले एक लाख ५० हजार ५ सय ५५ र दोस्रो हुने समूहले ७५ हजार ५ सय ५५ प्राप्त गर्ने छन् । यस्तै विधागत खेलाडीहरू सर्वश्रेष्ठ कोच,उत्कृष्ट फरवार्ड, उत्कृष्ट गोलकिपर, उत्कृष्ट डिफेन्स, उत्कृष्ट मिडफिल्डरलाई जनही ५ हजार र म्यान अफ द सिरिज हुने खेलाडीलाई १० हजार पुरस्कार रहेको छ ।