दशौँ हेटौडा भेट्रान्स कपको उपाधि किङकमलाई

२६ फागुन, हेटौंडा । हेटौडा भेट्रान्स क्लबको आयोजनामा गत फागुन २२ गतेदेखि भएको दशौं राष्ट्रिय हेटौंडा भेट्रान्स कप एट ए साइड रनिङ शिल्ड फुटबल प्रतियोगिताको उपाधि किङकम भेट्रान्स काठमाडौंले जितेको छ । हेटौडामा सोमबार सम्पन्न फाइनल खेलमा फ्रिडम फाइटर भेट्रान्स काठमाण्डौलाई टाईब्रेकरमा पराजित गर्दै किङकम भेट्रान्सले नगद एक लाख ५० हजार पाँचसय पचपन्न रुपैयाँको राशी हात पार्न सफल भएको हो ।
खेलको १४ औं मिनेटमा फ्रिडम फाईटर भेट्रान्सको तर्फबाट कृष्ण मालाकारले एक गोल गर्दै समूहलाई अग्रता दिलाए पनि खेलको २७ औं मिनेटमा किङकम भेट्रान्सका खेलाडी जगतमान लामाले गोल गर्दै बराबरीमा बनाएका थिए । निर्धारित समयमा दुवै समूहबाट बराबरी गोल भएपछि खेल टाईब्रेकरमा पुगेको थियो । टाईब्रेकरमा ३-२ गोल अन्तरमा किङकम भेट्रान्स विजेता भएको थियो । उपविजेता हुन सफल फ्रिडम फाईटर भेट्रान्सले नगद ७५ हजार ५ सय ५५ रुपैयाँ र शिल्ड प्राप्त गरेको प्रतियोगीता संयोजक मणिराज गौतमले बताए ।
प्रतियोगिता अन्तर्गत सर्वश्रेष्ठ कोच किङकम भेट्रान्सका राजकुमार पन्त, उत्कृष्ट फरवाड सरोज थापा, उत्कृष्ट गोलकिपर अमित प्रधान, उत्कृष्ट डिफेन्स सञ्जय राना मगर घोषित भएका थिए भने उत्कृष्ट मिडफिल्डर फ्रिडम फाईटरका उदय बहादुर गुरुङ घोषित भई जनही पाँच हजार नगद र ट्रफी प्राप्त गर्न सफल भए । 
यस्तै प्रतियोगिताको सर्वोत्कृष्ट खेलाडी फ्रिडम फाईटरका तेन्जिङ लामा घोषित भई नगद दश हजार सँगै ट्रफी प्राप्त गरे । 
बिजयी खेलाडीहरुलाई हेटौडा उपमहानगरपालिकाका नगर प्रमुख मिना कुमारी लामाले पुरस्कार प्रदान गरेकी थिइन् ।
समापन समारोहमा शिक्षासेवी पूरण बहादुर जोशी, एन्फाका केन्द्रीय सदस्य टिका लामा, हेटौंडा उपमहानगरपालिकाका वडा नम्बर ४ अध्यक्ष नवीन सिग्देल, वडा नम्बर ५ अध्यक्ष सुशील घिमिरे, वडा नम्बर ६ अध्यक्ष विष्णु बहादुर दाहाल,वडा नम्बर ७ अध्यक्ष दामोदर गौतम, वडा नम्बर ८ अध्यक्ष राम थापा, वडा नम्बर ९ अध्यक्ष शुकराम केसी, वडा नम्बर ११ अध्यक्ष जुना दाहाल, जिल्ला खेलकुद विकास समिति मकवानपुरका कार्यलय प्रमुख माधव कोईराला, बागमती प्रदेश फुटबल संघका महासचिव लवराज ठकुरी लगायत विभिन्न सङ्घसंस्थाका प्रतिनिधिहरूको सहभागिता रहेको थियो । प्रतियोगितामा मुख्य प्रायोजकका रूपमा हेटौँडा उपमहानगरपालिका रहेको थियो भने सह प्रायोजकका रूपमा हेटौडा स्कुल अफ म्यानेजमेन्ट रहेको थियो। विभिन्न पालिकाहरू, वडा कार्यालयहरू, संघसंस्था तथा समाजसेवी, फुटबल खेलप्रेमीहरुको सहयोग रहेको क्लबका अध्यक्ष रमेश उप्रेतीले बताए ।