क्षयरोगका ४०% बिरामी लुकेर बसेको हुन सक्ने अनुमान

सांकेतिक तस्विर

११ चैत, हेटौंडा । क्षयरोगका ४० प्रतिशत बिरामी समाजमा लुकेर बसेको हुन सक्ने अनुमान गरिएको छ । विश्व क्षयरोग दिवसको पूर्वसन्ध्यामा राष्ट्रिय क्षयरोग नियन्त्रण केन्द्रले गरेको पत्रकार सम्मेलनमा केन्द्रका निर्देशक डा. श्रीराम तिवारीले गत वर्ष पत्ता लागेका ४० हजार ७७६ जना बिरामी उपचाररत रहेको जानकारी दिए ।
उनका अनुसार, नेपालमा वार्षिक ६८ हजार क्षयरोगका बिरामी हुने गरेका छन् । उपचारको दायरामा नआउने र लुकेर बस्ने बिरामीहरूको खोजी गर्न केन्द्रले विभिन्न कार्यक्रम सञ्चालन गरेको छ ।
डा. तिवारीले क्षयरोगी बिरामीहरूमा पुरुषको संख्या ६१ प्रतिशत तथा महिलाको संख्या ३९ प्रतिशत रहेको जानकारी दिए । चौध वर्षमुनिका बालबालिकामा समेत क्षयरोगको संक्रमण बढ्दै गएको उनको भनाइ छ । क्षयरोग बिरामीहरूमध्ये १४ वर्षमुनिका बालबालिका ८.६ प्रतिशत छन् ।
'अझै पनि ४० प्रतिशत बिरामी समाजमा लुकेर बसेको हुन सक्ने हाम्रो तथ्यांकले देखाएको छ । त्यस्ता बिरामीहरू पत्ता लगाउन हामीले विभिन्न क्रियाकलपा गरिरहेका छौँ । त्यसअनुसार प्रत्येक वर्ष १६ हजार मानिसको मृत्यु क्षयरोगको कारण भएको अनुमान गरिएको छ', डा. तिवारीले भने । (बाह्रखरीबाट)