मकवानपुरको इन्द्रसरोवरमा पौडी खेल्दा डुबेर बेपत्ता ३ बालकको उद्धार

१८ चैत, हेटौंडा। मकवानपुरको इन्द्रसरोवर गाउँपालिका वडा नम्बर ३ सिस्नेरीमा पौडी खेल्ने क्रममा बेपत्ता  ३ बालक उद्धारगरी उपचारको लागि पठाइएको छ। 
सोमबार अपरान्ह ईन्द्रसरोवर गाउँपालिका वडा नम्बर -०३ सिस्नेरी स्थित कुलेखानी खोला नजिकै पानी जमेको दहमा पौडी खेल्न गएका ३ जना बालकहरु बेपत्ता भएको मकवानपुर प्रहरीले जनाएको छ ।

पौडी-खेल्ने क्रममा स्थानीय सुन्दर आचार्यको अन्दाजी १५ वर्षीय छोरा सुशान्त आचार्य,  काभ्रे नमोबुद्द फुलबारी दाप्चा घर हुने बर्ष १४ को प्रमेश घोरासैनि र निजकै भाइ अन्दाजी ११ बर्षीय प्रभात घोरासैनि बेपत्ता भएकोमा उद्वार गरि उपचारको लागि काठमाण्डौं  पठाईएको मकवानपुर प्रहरी प्रवक्ता प्रहरी नायब उपरीक्षक श्यामु अर्यालले जनाएका छन् ।
घटनाको जानकारी पाए लगतै प्रहरी चोकी सिस्नेरी, इलाका प्रहरी कार्यालय भिमफेदीबाट प्रहरी निरीक्षक ललिता ढकाल नेतृत्वको टोली पुगी डुबेर बेपत्ता बालकको उद्धार गरी उपचारको लागी काठमाडौं पठाइएको हो। उद्धार गरी पठाइएको ३ जना बालकको अवस्था गम्भिर रहेको जनाइएको छ । घटनास्थलमा मकवानपुर प्रहरी प्रवक्ता प्रहरी नायब उपरीक्षक श्यामु अर्यालले पुगेको र आवश्यक अनुसन्धान भइरहेको जनाइएको छ।