मकवानपुरको कैलाशमा लुटियो प्रहरीको पेस्तोल

१९ चैत, हेटौंडा। मकवानपुरको कैलाशमा  प्रहरीको पेस्तोल लुटिएको छ। 

मकवानपुरको कैलास गाउँपालिका–६ स्थित दुम्सीखर्क जंगलमा लागुऔषध कारोबारी रहेको सूचना पाएर ईलाका प्रहरी कार्यालय पालुङका प्रहरी  हवल्दार अर्जुन तामाङ र सहायक हवल्दार गोविन्द मगराती घटनास्थल पुगेका थिए।

घटनास्थलबाट लागुऔषध बरामद गरेर फर्किदै गर्दा पेस्तोल लुटपाट भएको मकवानपुरका प्रजिअ स्किम श्रेष्ठले प्रष्ट खबरलाई जानकारी दिइन्। हवल्दार तामाङ र सहायक हवल्दार गोविन्द्र मग्राती लागुऔषध कारोबार भइरहेको सूचना पाएर जंगलमा गएको सोमबार मध्यान्ह भएको घटनामा प्रहरीलाई देखेर २ केजी अफिम र मोटरसाइकल छाडेर लागुऔषध कारोबारी भागेका थिए । अफिम र मोटरसाइकल लिएर ईलाका प्रहरी कार्यालय पालुङतर्फ आउँदै गर्दा ठुलो समूहमा रहेका स्थानीयले घेरा हालेर प्रहरीलाई कुटपिट समेत गरेर ७ राउण्ड गोली लोड भएको टाइप–५४ पेस्तोल लुटपाट भएको प्रजिअ श्रेष्ठले स्विकार गरिन्। 
घटना पाए लगतै जिल्ला प्रहरी कार्यालय मकवानपुरका प्रहरी नायब उपरिक्षक श्यामु अर्यालको नेतृत्वमा प्रहरी परिचालन भएपनि हतियार अझै फेला नपरेको यो समाचार तयार पर्दा सम्म प्रजिअ श्रेष्ठले जानकारी दिइन् ।

अहिले कारोबारी र पेस्तोल खोजीका लागि  ईप्रका पालुङका इन्स्पेक्टर सविनबावु अर्याल, मनहरीका इन्स्पेक्टर विशाल सापकोटा, जिल्ला प्रहरी कार्यालय मकवानपुरका डीएसपी श्यामु अर्याल र धादिङस्थित ईलाका प्रहरी कार्यालय गजुरीका इन्स्पेक्टर सुमन चापागाईं नेतृत्वमा प्रहरी खटि गएको जनाइएको छ ।