कैलाश-६ मा लुटिएको प्रहरीको पेस्तोल १ नम्बर वडामा भेटियो (अपडेट)

File photo

१९ चैत, हेटौंडा ।मकवानपुरमा कैलाशमा लुटिएको गोली लोड भएको नेपाल प्रहरीको पेस्तोल फेला परेको छ ।

सोमबार मकवानपुरको कैलास गाउँपालिका–६ स्थित दुम्सीखर्क जंगलमा लागुऔषध कारोबारीले लुटेर लगेको प्रहरीको पेस्तोल कैलाश गाउँपालिका वडा नम्बर–१ बोल्ने लेक भन्ने जंगलमा गोली सहित फेला पारेको घटनास्थलमै रहेका मकवानपुरका प्रहरी प्रवक्ता प्रहरी नायब उपरीक्षक श्यामु अर्यालले जनाएका छन्। लागुऔषध कारोबारीको अप्रेशनमा गएका ईलाका प्रहरी कार्यालय पालुङका हवल्दार अर्जुन तामाङले बोकेको ७ राउण्ड गोली लोड भएको टाइप-५४ पेस्तोल  लागूऔषध कारोबारीले लुटेर भागेका  थिए ।

अप्रेशनमा हवल्दार अर्जुन तामाङ र सहायक हवल्दार गोविन्द्र मग्रातीको संयुक्त घटनास्थल पुगेका थियो।  पेस्तोल र यसको लुटेराहरुको खोजीका लागि गएराती देखिनै जिल्ला प्रहरी कार्यालय मकवानपुरका प्रहरी नायब उपरिक्षक श्यामु अर्यालको नेतृत्वमा इलाका प्रहरी कार्यालय गजुरीबाट प्रहरी निरीक्षक सुमन चापागाईं, इलाका प्रहरी कार्यालय मनहरीबाट प्रहरी निरीक्षक विशाल सापकोटा र इलाका प्रहरी कार्यालय पालुङका प्रहरी निरीक्षक सविनबावु अर्यालको टोली लागी परेको थियो।

हवल्दार तामाङ र सहायक हवल्दार गोविन्द्र मग्राती लागुऔषध कारोबार भइरहेको सूचना पाएर जंगलमा गएका थिए । सोमबार मध्यान्ह प्रहरीलाई देखेर २ केजी अफिम र मोटरसाइकल छाडेर लागुऔषध कारोबारी भागेका थिए ।अफिम र मोटरसाइकल लिएर ईलाका प्रहरी कार्यालय तर्फ आउँदै गर्दा ठुलो समूहले घेरा हालेर प्रहरीलाई कुटपिट समेत गरेर पेस्तोल लुटेर भागेका थिए । यद्यपी कारोबारीलाई भने पक्राउ गर्न नसकेको जनाइएको छ । स्थानीयको कुटपिटबाट घाइते  २ प्रहरीको काठमाडौंमा उपचार भइरहेको जनाइएको छ।