मकवानपुरको पालुङमा बसको ठक्करबाट दुईको मृत्यु,चार घाइते

१२ जेठ, हेटौंडा । त्रिभुवन राजपथ अन्तर्गत मकवानपुरको थाहानगरपालिका वडा नम्बर-३ नेपाल विद्युत प्राधिकरण पालुङ वितरण केन्द्र नजिकै बसले ६ पैदलयात्रीलाई ठक्कर दिदा २ जनाको मृत्यु भएको र अन्य ४ घाइते भएका छन।

सोमबार अपरान्ह बज्रबाराही गोपाली गाँउबाट थानाबजार तर्फ जादै गरेको बा ३ ख ५९९० नम्बरको बस ब्रेक फेल भई सडकमा हिडिरहेका ६ जनालाई ठक्कर दिदा २ जनाको मृत्यु भएको र ४ जना घाइते भएको मकवानपुर प्रहरीले जनाएको छ ।मृत्यू हुनेमा पैदलयात्री हालसम्म वतन नखुलेको अन्दाजी ३५।४० वर्षीय कृष्ण बलामी,  वतन नखुलेकै अन्दाजी ३५।४० वर्षीय लोकेन्द्र कुमार ठाकुर रहेको जनाइएको छ।मृतक बलामी लेखापढी गर्ने र ठाकुर सप्तरी जिल्लाको विष्णुपुर गाउँपालिका–५ घर भई हाल झम्केश्वरी माविका शिक्षक रहेको जनाइएको छ। उनीहरु दुवैको उपचारको क्रममा प्राथमिक स्वास्थ्य केन्द्र पालुङमा ज्यान गएको मकवानपुर प्रहरी प्रवक्ता प्रहरी नायब उपरीक्षक श्यामु अर्यालले जनाएका छन्। त्यसैगरी बसको ठक्करबाट हालसम्म वतन नखुलेको अन्दाजी ३५/३६ वर्षीय रघुनन्दन यादव(झम्केश्वरी मावि कै शिक्षक रहेको) , हाल वतन नखुलेको  अन्दाजी ३५/३६ वर्षीय कमलेश कुमार साह, बारा जितपुर सिमरा -१७ बस्ने  अन्दाजी ३२ वर्षीय छेयाङ दोर्ज लामा र  बारा कोल्बि नगरपालिका ०१ बस्ने अन्दाजी ३० वर्षीय रामगुलाम चौधरी  घाइते भएको प्रहरीले जानकारी दिएको छ। घाइते यादव र साहाको अवस्था गम्भीर रहेको र थप उपचारका लागि ट्रमा टेन्टर काठमाडौं पठाइएको र अन्य दुईको पालुङमै उपचार भइरहेको छ। ठक्कर दिने बस तथा चालकलाई प्रहरीले नियन्त्रणमा लिइसकेको छ। उक्त बसले थाहानगरमा उप प्रमुख भरत गोपालीको घरमा समेत क्षति पुर्याएको छ ।