मकवानपुर ३० औं साक्षर जिल्ला घोषणा

३० भदौ, हेटौँडा । मकवानपुर विहिबार देशको ३० औं साक्षर जिल्लाको रुपमा विहिबार घोषणा गरिएको छ । शिक्षामन्त्री धनिराम पौडेलले हेटौँडाको पल्पसा सभागृहमा भएको घोषणा सभामा मकवानपुरलाई साक्षर जिल्ला घोषणा गरेका हुन् । 
देशभरका ५९ जिल्ला साक्षर घोषणा गर्ने क्रममा २९ जिल्ला यसअघि घोषणा भईसकेको र मकवानपुर ३० औं जिल्ला भएको मन्त्री पौडेलले बताए । उनले बाँकीलाई साक्षर जिल्ला घोषणा गर्ने क्रम तिब्र बनाईएको उनले बताए । कार्यक्रममा बोल्दै उनले साक्षर जिल्ला घोषणा भएकोमा मकवानपुरबासीमा आभार व्यक्त गर्दै निरतर साक्षरताको अभियान जारी राख्न आग्रह गरे । उनले शिक्षालाई आयआर्जनसंग जोड्नुपर्ने बताउँदै यस अनुसार सरकार अघि बढेको बताए । 
राष्ट्रभाषा र मातृभाषाका वर्ण र अक्षर पढन सक्ने, मातृभाषा र नेपाली भाषामा लेखिएका मुल्यसूचि, बिल पढ्न सक्ने, आफ्नो परिवारका सदस्यहरुको नाम, उमेर पढन,लेख्न सक्ने, ० देखि ९ सम्मका अंक पढलेख गर्न सक्ने, १ देखि १०० सम्म गणना गर्न सक्ने, सरल लेनदेनका हिसावहरु राख्न सक्ने, घडी हेरेर समय बनाउन सक्ने, मोवाइलका अंक चिनी प्रयोग गर्नसक्ने लगायतका सूचकका आधारमा मकवानपुरलाई साक्षर जिल्ला घोषणा गरिएको मकवानपुरका जिल्ला शिक्षा अधिकारी अम्विकाप्रसाद आचार्यले कार्यक्रममा जानारी दिए । 
२०६८ को जनगणना अनुसार मकवानपुरको १५ देखि ६० बर्ष उमेर समूहका मध्ये ९८ दशमलव ९७ प्रतिशत साक्षर भएकाले जिल्लालाई साक्षर जिल्ला घोषणा गरिएको हो । कूलजनसंख्या २ लाख ३८ हजार ४ सय ९७ मध्ये १५ देखि ५० उमेर समूहका २ लाख २६ हजार ५० सय साक्षर रहेका छन् । 
भारी बर्षाका बीच भएको घोषणा सभालाई मकवानपुरका सांसद अनन्त पौडल, गणेश थापा, शिक्षा मन्त्रालयका सचिव शान्तबहादुर श्रेष्ठ, मध्यमाञ्चल क्षेत्रीय शिक्षा निर्देशक दिनेशकुमार श्रेष्ठ, मकवानपुरका प्रमुख जिल्ला अधिकारी डा. मानबहादुर विके, राजनैतिक दलको तर्फबाट राप्रपा नेपालका केन्द्रिय सदस्य नवराज विष्ट, जिविसका सामाजिक विकास अधिकृत रामकृष्ण थापा लगायतले मन्तव्य व्यक्त गरेका थिए । यसअघि विद्यार्थी, शिक्षक, अभिभावक र शिक्षा क्षेत्रका सरोकारवाला निकायका प्रतिनिधिसहितको र्यालीले बजार परिक्रममा गरेको थियो ।