अछाममा आइतबार रातिको हावाहुरीले दर्जनौ घरमा क्षति

१९ जेठ, मंगलसेन। आइतबार साँझ आएको भीषण हावाहुरीका कारण अछामको विभिन्न स्थानमा क्षती पुगेको छ भने एक दर्जन भन्दा बढी घरको छाना उडाएको छ।
हावा हुरीले जिल्लाको पञ्चदेवल विनायक र रामारोशन गाउँपालिकामा क्षति पुर्‍याएको अछाम प्रहरीले जानकारी दिएको छ। हावाहुरीले पञ्चदेवल विनायक नगरपालिका–२   हवाजै कामीको घर वरपर देखिएको छ। उनको बगैँचामा रहेको रुखको हाँगा भाँचिएर शौचालय र सोलार प्यानल पूर्ण रूपमा क्षतिग्रस्त भएको छ। त्यस्तै सो ठाउँको  लेख काडाँगाउँकी पवित्रा देवी धामीको २ दुई तले चारकोठे कच्ची घरको छाना उडाएको छ। पञ्चदेवल विनायक–३ का सिरे कामीको जस्तापाताले छाइएको दुई तले घरको छाना उडाएको छ भने, नादीमा बस्ने तप्तराज तिमिल्सेनाको घरमा भने मेलको रुख भाँचिएर घरमाथि खसेपछि घर पूर्ण रूपमा भत्किएको अछाम प्रहरी प्रमुख डीएसपी ईश्वरी प्रसाद भण्डारीले बताएका छन् ।
त्यसैगरी हावाहुरीले जिल्लाको रामारोशन गाउँपालिका–५, नेटाकोटस्थित यशोदा माविको दुई तले एक कोठे भवनको टिनको छाना उडाएको छ। त्यस्तै, सोही ठाउँका शक्ति बहादुर साउदको गाडी राख्ने ग्यारेजको छानासमेत हावाहुरीले उडाएको छ।यता पञ्चदेवल विनायक–५ का टंकबहादुर साही, वडा नं. ४ का मीन बहादुर बिक, र वडा नम्बर ३ का दान बहादुर कठायत, भरत अधिकारी, र रण बहादुर रावलका घरहरूमा पनि छाना र संरचनात्मक क्षति पुगेको छ। कमल साउँदको जस्तापाताको घर त पूरै उडाएको प्रहरीले जनाएको छ ।प्रहरीलाई  प्राप्त विवरणअनुसार घटनामा कुनै पनि मानवीय वा चौपाया क्षति को पुष्टि नभएको डिएसपी भण्डारीले जनाएका छन् ।