नेपालले सिंगापुरलाई ६ विकेटले हरायो

८ असार, हेटौंडा । एसीसी मेन्स यू–१६ इस्ट जोन कपमा नेपालले विजयी सुरुवात गरेको छ । मलेसियाको यूकेएम ओभल मैदानमा आज सुरु भएको प्रतियोगिताको पहिलो खेलमा नेपालले सिंगापुरलाई ६ विकेटले हराएको हो । 
टस जितेर सुरुमा ब्याटिङ रोजेको सिंगापुरले दिएको १ सय ३९ रनको लक्ष्य नेपालले ३३.३ ओभरमा चार विकेटको क्षतिमा भेट्टायो । नेपालको जितका लागि ९७ बल सामना गरेका ओपनर ब्याटर प्रसिद्ध जैशीले ५ चौकासहित अविजित सर्वाधिक ५५ रनको योगदान दिए । 
त्यस्तै रौनक श्रीवास्तवले ४० रनको योग्दान दिँदा शुभम खनाल ९ रनमा अविजित रहे । सिंगापुरका लागि बलिङमा आकाश तेजाले सर्वाधिक ३ विकेट लिए भने युभान पाण्डेले १ विकेट लिए । ३६.१ ओभरमा अलआउट हुँदै १३८ रन बनाएको सिंगापुरका लागि कप्तान रियान नैकले ५३ रनको अर्धशतकीय पारी खेले । त्यस्तै ओपनरद्वय रोहन अरुण र आहान वुथानदमले क्रमशः ११ र ३८ रन बनाए । 
त्यसबाहेक प्रनाथ इशान मिदुरीले १२ रन बनाउनु बाहेक अन्य कुनै पनि ब्याटरले दोहोरो अंकमा रन बनाउन सकेनन् । यता नेपालका लागि १० ओभर बलिङ गरेका कप्तान विपिनप्रसाद शर्माले १ मेडनसहित ३४ रन खर्चिएर सर्वाधिक ४ विकेट झारे ।
त्यस्तै सचिन भट्टले ३, शुभम खनाल र अभय यादवले समान १–१  विकेट हात पारे । नेपालसहित १० वटा टोली सहभागी १६ वर्षमुनिको जारि इस्ट जोन कपको समूह ‘ए’ मा नेपालसहित सिङ्गापुर, इन्डोनेसिया, भुटान र जापान रहेका छन् । समूह ‘बी’मा आयोजक मलेसियासहित हङकङ, माल्दिभ्स, थाइल्यान्ड र म्यानमार छन् । नेपालले प्रतियोगिताको दोस्रो खेल मंगलबार जापानसँग खेल्नेछ ।