हेटौंडामा अर्का वडाध्यक्ष माथि हातपात, शुक्रबार उपमहानगरको काम ठप्प

१९ असार, हेटौंडा। हेटौंडा १ का वडाध्यक्ष सविन न्यौपाने माथि हातपातको घटना सेलाउन नपाउँदै बिहीबार फेरी अर्का वडाध्यक्षमाथि दिनदहाडै हातपात भएको छ।

बिहीबार सार्वजनिकस्थलमै हेटौंडा उपमहानगरपालिका वडा नम्बर ४ का वडाध्यक्ष नवीन सिग्देलमाथि  हातपात भएको हो । सिग्देललाई एक निर्माण व्यवसायी महिलाले हातपात गरेको जनाइएको छ ।
बिहीबार हेटौंडा ४ हेटौंडा क्याम्पसअगाडिबाट हुप्रचौरतर्फ निस्कने सडक विस्तारको विषयमा छलफल भइरहेका बेला वडाध्यक्ष सिग्देलमाथि  काभ्रे रोशी गाउँपालिका घर भएकी निर्माण व्यवसायी मञ्जु लामाले हातपात गरेको मकवानपुर प्रहरीले जनाएको छ ।
सडक निर्माणको ढिलासुस्तीलाई लिएर विवाद सुरु भएको समयमा निर्माण व्यवसायी लामाले भिडियो खिच्न खोज्दा आफूले भिडियो खिच्न नदिएको विषयलाई लिएर आफूमाथी आक्रमण भएको वडा अध्यक्ष सिग्देलले बताएका छन्।
"मैले स्थानीयहरुसंग लामो समयदेखि अलपत्र छाडिएको  सडक निर्माणमा सहजीकरण गरिरहेको समयमा एक्कासी म माथि ट महिलाले  हातपात गरेको" - वडा अध्यक्ष सिग्दलले भने । 

यता हातपात गर्ने महिलालाई  नियन्त्रणमा लिएको  मकवानपुर प्रहरी प्रवक्ता प्रहरी नायब उपरीक्षक श्यामु अर्यालले जनाएका छन् । बिहीबारको उक्त घटानापछि सडक निर्माण कार्य रोकिएको छ भने वडा कार्यालयले शुक्रबारका लागि तय भएका सम्पूर्ण कार्यक्रमहरु स्थगित गरेको जनाएको छ। यस्तै हेटौँडा उपमहानगरपालिकाले पनि जनप्रतिनिधिमाथि निरन्तर भइरहेको आक्रमणको घटनामा दोषीलाई कारवाही नभएको भन्दै विरोधमा शुक्रबार सम्पूर्ण सेवा बन्द गर्ने निर्णय गरेको छ। 

उपमहानगर प्रमुख मीनाकुमारी लामाले बिहीबार साँझ पत्रकारहरुसँग कुरा गर्दै नगरका वडाध्यक्षहरूको सुरक्षामा गम्भीर चुनौती देखिएकाले विरोध स्वरुप एकदिन पालिकाभित्रका सम्पूर्ण कामहरु बन्द गर्नुपरेको बताइन्। यस घटनाले  हेटौंडाको सुरक्षा माथि चुनौती थपिएको छ। पत्रकारलाई प्रशासन कार्यालयमा फोटो र भिडियो खिच्न प्रतिबन्ध लगाउने प्रमुख जिल्ला अधिकारीलाई यस किसिमको घटनाले सुरक्षा व्यवस्थामा असफल तुल्याएको छ। यता मकवानपुर प्रहरीले घटनाको आवश्यक अनुसन्धान भइरहेको जनाएको छ ।