बागमती प्रदेशको बजेट बहुमतले पारित

२३ असार, हेटौंडा। बागमती प्रदेश सरकारको आर्थिक वर्ष २०८२/०८३ को लागि विनियोजन ६७ अर्ब ४७ करोड रुपैयाँको बजेट  पारित भएको छ।
सोमबार चलेको बैठकले अर्थ सम्बन्धी प्रस्तावलाई कार्यान्वयन गर्न बनेको विधेयक र विनियोजन विधेयक २०८१ बहुमतले पारित गरेको हो। बजेटमा खर्च कटौतीको प्रस्ताव अस्वीकृत भएपछि, प्रदेश सभामा बजेटमाथि छलफल भएको थियो ।
बजेटमा देखिएको विवाद समाधानका लागि ८ बुँदे सहमति सहितको पूरक प्रस्ताव पेस गरिएको थियो।
सोमबारको बैठकले प्रदेश सरकारको बजेटको पुरक प्रस्ताव समेत स्वीकृत गरेको छ । 
आजको बैठकमा बागमती प्रदेशका आर्थिक मामिला तथा योजना मन्त्री कुन्दनराज काफ्लेले संसदमा पेस गरेको प्रदेश सरकारको आर्थिक वर्ष २०८२/०८३ को सेवा र कार्यका लागि प्रदेश सञ्चित कोषबाट केही रकम विनियोजन गरियोस् र प्रदेश सरकारको अर्थ सम्बन्धी प्रस्तावलाई पारित गरियोस् भन्ने प्रस्तावलाई बहुमतले पारित गरेको हो ।पेस गरेको उक्त प्रस्तावलाई सभामुख भुवन कुमार पाठकले निर्णयार्थ पेस गरेका थिए । सभामुख पाठकले निर्णायार्थ पेस गरिएको उक्त प्रस्तावको पक्षमा रहेर सत्तारुढ दलका सांसदहरुले हुन्छ भनेका थिए भने प्रतिपक्षका सांसदहरूले हुन्न भनेका थिए ।
उक्त प्रस्तावलाई विनियोजन विधेयकको अङ्ग बनोस् भन्ने प्रस्ताव प्रदेशसभा बैठकले बहुमतले स्वीकृत गरेको हो ।बागमती सरकारको आगामी आर्थिक वर्ष २०८२/०८३ को लागि ६७ अर्ब ४७ करोड ७३ लाख रुपैयाँको बजेट प्रस्ताव गरेको थियो।