अछाममा सर्वसाधारण कुट्ने वडाध्यक्ष सहित २ जना पक्राउ

१ साउन, मंगलसेन। अछाममा कुटपिटको घटनामा संलग्न  एकजना वडाध्यक्ष सहित २ जना पक्राउ परेका छन्।

असार २२ गते जिल्लाको मंगलसेन नगरपालिका वडा नम्बर ५ स्थित सनसाइन प्लाजा होटलमा अछाम तुर्माखाँद गाउँपालिका वडा नम्बर ३ भैरबस्थानका  ३१ वर्षीय कर्ण बहादुर बुढालाई घेरा हालेर कुटपिटको घटनामा संलग्न मंगलसेन ९ जना मध्ये वडा नम्बर ५ का वडाध्यक्ष झंकार भाट सहित अन्य १ जनालाई अछाम प्रहरीले पक्राउ गरेको अछामका प्रहरी प्रमुख प्रहरी नायव उपरीक्षक ईश्वरी प्रसाद भण्डारीले बताएका छन् ।

झंकार भाट सहित ३५ वर्षीय बल भाट ,बर्ष अन्दाजी २६ को कमल भाट, बर्ष अन्दाजी ३२ को मदन बिष्ट, ऐ. वडा नम्बर ४ बस्ने बर्ष अन्दाजी २७ वर्षीय बिष्णे कठायत र अन्य नाम थाहा नभएका ४ जना गरी ९ जनाले बुढासँग वादबिवाद गरी निजलाई हात, मुक्का, लात्ता,धारीलो हतियार नक, खुकुरी र फलामको रड प्रहार घरी घाइते बनाएको उजुरीको आधारमा प्रहरीले पक्राउ गरेको प्रहरी प्रमुख भण्डारीले जानकारी दिएका हुन्। 
बुढाको अनुहारको भाग चिउडोको भाग तथा शरीरको अन्य भागहरूमा गम्भिर चोटपटक लागेको, २  वटा दाँत भाँचिएको र उनको स्थानीय अस्पतालमा उपचार भइरहेको जनाइएको छ।
घटनामा संलग्न मध्ये झंकर भाट र मदन बिष्टलाई पक्राउ  गरिएको र अन्यको खोजी कार्य भइरहेको जनाइएको छ। घटनाको आवश्यक अनुसन्धान भइरहेको प्रहरीले जनाएको छ। झंकार भाट २०७९ सालमा भएको स्थानीय तह सदस्य निर्वाचनमा नेकपा एमालेबाट मंगलसेन नगरपालिका वडा नम्बर ५ मा वडाध्यक्षमा निर्वाचित भएका थिए।