पत्रकार ऐन कार्यान्वयन नभएको गुनासो

२० फागुन, हेटौँडा । श्रमजीवि पत्रकार ऐन कार्यान्वयनको अवस्था सम्बन्धी अन्तरक्रिया आइतबार हेटौँडामा सम्पन्न भएको छ । न्यूनतम पारिश्रमिक निर्धारण समितिको आयोजना एवं नेपाल पत्रकार महासंघ मकवानपुरको समन्वयमा कार्यक्रम भएको हो । 
नेपाल पत्रकार महासंघका केन्द्रीय अध्यक्ष गोविन्द आचार्य, न्यूनतम पारिश्रम निर्धारण समितिका अध्यक्ष गंगाधर पराजुली, महासंघका केन्द्रीय कोषाध्यक्ष राजेश मिश्र, सचिव रामप्रसाद दाहाल लगायतले श्रमजीवि पत्रकार ऐन कार्यान्वयनको बारेमा छलफल गरेका थिए । कार्यक्रममा सहभागी मकवानपुरका संचारकर्मीहरुले जिल्लामा श्रमजीवि पत्रकार ऐन कार्यान्वयन नभएकोमा गुनासो गरेका थिए ।
कार्यक्रममा बोल्दै महासंघका केन्द्रीय अध्यक्ष आचार्यले संचारमाध्यमलाई पनि पुर्नसंरचनाको आवश्यक रहेको भन्दै पारिश्रमिक कार्यान्वयनमा जोड दिएका थिए । कार्यक्रममा समितिका अध्यक्ष गंगाधर पराजुलीले ऐन कार्यान्वयनका लागि सबै संचारमाध्यमहरुलाई आग्रह गरेका थिए । उनले ऐन कार्यान्वयनको अवस्था सन्तोषजनक नरहेको भन्दै राज्यतहमा सुझाव दिन यस्ता कार्यक्रम आयोजना गरिएको बताए ।
कार्यक्रममा नेपाल पत्रकार महासंघ मकवानपुरका अध्यक्ष हरि हुमागाई, ब्रोडकाष्टिङ एशोसियसन अफ नेपालका केन्द्रीय कोषाध्यक्ष उज्वल चौलागाई, महासंघका पूर्व केन्द्रीय सदस्य प्रताप विष्ट, महासंघ मकवानपुरका पूर्व अध्यक्ष भानुभक्त आचार्य, उपाध्यक्ष कुमार अधिकारी लगायतले मन्तव्य व्यक्त गरेका थिए ।