बहादुर सिंह लामाले आइतबार राजिनामा दिँदै

१७ साउन, हेटौंडा। नेपाली  कांग्रेस बागमती प्रदेश संसदीय दलको नेताबाट पराजित भएपछि सरकार छाड्न आनाकानी गरिरहेका मुख्यमन्त्री बहादुर सिंह लामाले आइतबार राजिनामा दिने  भएका छन।
लामाले राखेको सर्तमा छलफल पछि संसदीय दलको नेतामा निर्वाचित इन्द्र बहादुर बानियाँले समर्थन जनाएपछि उनले आइतबार राजिनामा दिने लगभग निश्चित भएको हो। 
बिहीबार साँझ कांग्रेस सभापति शेरबहादुर देउवासँग वान टू वान वार्तामा देउवाले राजिनामा दिएर मार्ग प्रशस्त गर्न लामालाई निर्देशन दिएका थिए।
शुक्रबार र शनिबार आफु निकट सांसदसँगको छलफल पछि लामाले सभापति देउवा र बानियाँसँग सर्त राखेका थिए।
देउवाको उपस्थितिमा बुढानीलकण्ठमा भएको छलफलमा लामाले साउन १४ गते मन्त्री नियुक्त गरेका गोविन्द लम्साल, माया श्रेष्ठ र गीता गुरुङलाई निरन्तरता दिने सर्त राखेका थिए। मुख्यमन्त्री बन्दै गरेका बानियाँले उनको सर्तमा समर्थन जनाएपछि उनको राजीनामा लगभग निश्चित भएको हो। बागमती प्रदेश प्रमुख दीपक प्रसाद देवकोटा अस्पतालमा भर्ना भएकोले आइतबार हेटौंडा आएर राजीनामा दिने उनी निकट सासंद तिर्थ लामाले जानकारी दिएका छन्।
"शनिबारनै हेटौंडा गएर राजिनामा दिने तयारी रहेकोमा प्रदेश प्रमुख देवकोटा अस्वस्थ भएर उपचारार्थ रहनुभएकोले सम्भवतः भोली हेटौंडा पुगेर पत्रकार सम्मेलन गरेर राजिनामा दिनुहुन्छ" - लामाले भने।
गत बुधबार संसदीय दलको नेतामा पराजित भएपछि राजिनामा नदिने प्रतिक्रिया दिएका थिए। मुख्यमन्त्री लामाको राजीनामासँगै बागमती प्रदेश सरकार ढल्नेछ भने प्रदेश प्रमुखद्वारा  सरकार गठनका लागि मुख्यमन्त्रीको दावी पेश गर्न आव्हान गर्नेछन्। कांग्रेस - एमालेको गठबन्धन रहेको अवस्थामा भर्खरै कांग्रेस संसदीय दलको नेतामा निर्वाचित भएका इन्द्र बहादुर बानियाँ सम्भवतः मुख्यमन्त्री बन्नेछन्।