बागमतीमा मूख्यमन्त्रीको सपथ आजै,कांग्रेसका२,एमालेका ६ मन्त्री बन्दै

प्रष्टखबर ब्युरो 
२० साउन,हेटौंडा। बागमती प्रदेशका प्रदेश प्रमुख दीपक प्रसाद देवकोटाले नयाँ सरकार गठनका लागि गरेको आव्हान मंगलबार दिउँसो २ बजे सक्किदै छ। दुई वा दुईभन्दा बढी दलको समर्थनमा दावी पेस गर्न गरिएको आव्हान लगत्तै कांग्रेस बागमती प्रदेश संसदीय दलका नेता ईन्द्रबहादुर बानियाँले सोमबारनै एमालेको समर्थनमा मुख्यमन्त्रीको दावी पेस गरिसकेका छन्।
समयावधि सक्किए लगतै प्रदेश प्रमुखले बानियाँलाई मुख्यमन्त्री नियुक्त गर्नेछन्। बानियाँ नेतृत्वको बागमती प्रदेश सरकारमा काग्रेसबाट दुई जना र  नेकपा एमालेबाट ६ जनालाईनै आजै मन्त्री नियुक्त गरिने प्रष्टखबरलाई स्रोतले बताएको छ। बानियाँको मन्त्रीमण्डलमा  कांग्रेसबाट प्रभात तामाङ र शिवराज अधिकारी मन्त्री नियुक्त हुने प्रवल संम्भावना रहेको स्रोतले जनाएको छ। यता एमालेबाट एक जना बहादुर सिंह लामा नेतृत्व सरकारकै मन्त्री दोहोरिने र बाँकि ५ जना नयाँ अनुहार मन्त्री बन्नेछन्।एमालेले संसदीय दलको प्रमुख सचेतक मधुसूदन पौडेलको नेतृत्वमा सरकारमा सहभागिता जनाउँदै छ। एमाले स्रोतले दिएको जानकारी अनुसार किरण थापा मगर – स्वास्थ्य मन्त्री (पुनः नियुक्त), जयराम थापा – श्रम, रोजगार तथा यातायात मन्त्री, भरतबहादुर केसी – वन तथा वातावरण मन्त्री, मधुसुधन पौडेल – कृषि तथा पशुपन्छी विकास मन्त्री, डा. दिनेशचन्द्र देवकोटा – भौतिक पूर्वाधार विकास मन्त्री, बिन्दु श्रेष्ठ – उद्योग, वाणिज्य, भूमि तथा प्रशासन मन्त्री नियुक्त हुने जनाइएको छ।  दिउँसोसम्म कुनै फेरबदल नभए वहाँहरुनै मन्त्री हुनुहुनेछ एमाले स्रोतले स्पष्ट पारेको छ। नियुक्त भएसँगै अपरान्ह ४ बजेपछि प्रदेश प्रमुखको कार्यालयमा मुख्यमन्त्री सहित मन्त्रीहरुको सपथग्रहण कार्यक्रम रहेको बुझिएको छ। बागमती प्रदेशमा कांग्रेस र एमालेको गठबन्धन रहेको अवस्थामा गठबन्धनका ६४ सांसदको बानियाँलाई समर्थन रहनेछ। मंगलबार साँझै सपथग्रहणको लागि प्रदेश प्रमुखको कार्यालय परिसरमा धमाधम तयारी भइरहेको जनाइएको छ।