मुख्यमन्त्री बानियाँको घोषणा:निवास र कार्यालयको खर्च कटौती हुन्छ

२८ साउन, हेटौंडा। बागमती प्रदेशका मुख्यमन्त्री इन्द्रबहादुर बानियाँले मुख्यमन्त्री निवास र मुख्यमन्त्री कार्यालयमा हुने खर्चको ५०% कटौती हुने बताएका छन् ।
बुधबार बसेको प्रदेशसभाको विशेष समयपछि समय माग गरेर सम्बोधन गर्दै उनले विगतका मुख्यमन्त्रीहरुले गर्दै आएको खर्चलाई ५० प्रतिशत कटौती गर्ने घोषणा गरेका हुन् । त्यसैगरी उनले सम्बोधनका क्रममा  आफ्नो निर्वाचन क्षेत्रका विपन्न नागरिकका लागि दशैँ अगाडि घर बनाउने प्रतिवद्धता जनाएका छन् ।

सम्बोधनकै क्रममा उनले गरिब विपन्न वर्गलाई लक्षित गरी छात्रवृत्ति वितरण गर्ने र विपद् व्यवस्थापनलाई प्राथमिकता दिने बताएका छन् ।
"मेरो कार्यकालमा सुशासन र पारदर्शिता कायम गर्दै जवाफदेहीता सहितको काम हुनेछ, यो मेरो प्रतिवद्धता हो"-बानियाँले भने। बानियाँले आफूले गरेको बाचा स्वरुप आगामी दशैँ अगाडि नै आफ्नो निर्वाचन क्षेत्र मकवानपुर क्षेत्र नम्बर २ (ख)का विपन्न नागरिकको घर बनाउने बताएका छन्। साउन २० गते मुख्यमन्त्री नियुक्त पसि बसेको मन्त्रिपरिषद्को पहिलो बैठकबाट सेवा सुविधा बापत प्राप्त हुने रकम निर्वाचन क्षेत्रमा गरिब विपन्नको घर बनाउन खर्च गर्ने घोषणा गरेका थिए । बागमती प्रदेशका छैठौं मुख्यमन्त्री नियुक्त भएका बानियाँले सदनबाट हिजोमात्र विश्वासको मत प्राप्त गरेका थिए।