नेपालले होबार्ट हरिकेन्सलाई हरायो

३ भदौ, हेटौंडा । अस्ट्रेलियामा जारी टप एन्ड ट्वान्टी-२० सिरिजमा नेपालले पहिलो जित निकालेको छ । नेपालले होबार्ट हरिकेन्स एकेडेमीलाई ६६ रनले पराजित गर्दै पहिलो जित दर्ता गराएको हो ।
टस जितेर पहिला ब्याटिङ रोजेको नेपालले निर्धारित २० ओभरमा सात विकेट गुमाउँदै १८० रन बनाएको थियो ।
नेपालका लागि आरिफ शेखले सर्वाधिक ३३ रनको योगदान दिए । आसिफ शेखले २९ रन, लोकेश बमले अविजित २५ रन, कुशल भुर्तेलले २७ रन, भीम सार्कीले १८ रन र कप्तान रोहितकुमार पौडेलले ९ रन जोडे ।
१८१ रनको लक्ष्य पछ्याएको होबार्ट हरिकेन्सले १६ दशमलव एक ओभरमा सबै विकेट गुमाउँदै ११४ रन मात्र बनायो । नेपालका नन्दन यादव एक्लैले पाँच विकेट लिए । कप्तान रोहितकुमार पौडेल, सन्दीप लामिछाने, कुशल भुर्तेल र रिजन ढकालले एक/एक विकेट लिए ।  
होबार्ट हरिकेन्सका ब्राड्ली होपले ३१ तथा चार्ली वाकिमले  २८ रन बनाए । बलिङतर्फ होबर्टका निवेथन राधाकृष्णन र राफ म्याकमिलनले दुई-दुई तथा मार्कस बेन, गाबे बेल र ब्राडली होपले एक एक विकेट लिए । नेपाल यसअघि खेलेका तीनवटै खेलमा पराजित भएको थियो । नेपाल नर्दर्न टेरिटोरी स्ट्राइकरसँग ४२ रन, बङ्गलादेश ‘ए’सँग ३२ तथा मलेबर्न स्टार्स एकेडेमीसँग ३१ रनले पराजित भएको थियो ।
नेपालले अब बुधबार मेलवर्न रेनेगेड्ससँग तथा शुक्रबार पाकिस्तान शाहिन्ससित खेल्ने छ ।