कर्मचारी नहुँदा बैठक संचालनमा समस्या : उपसभामुख तामाङ

२६ फागुन, हेटौँडा । ३ नम्बर प्रदेशकी उपसभामुख राधिका तामाङले कर्मचारी अभावमा प्रदेशसभा बैठक संचालन गर्न समस्या परेको गुनासो गरेकी छिन् ।

तामाङ सञ्चार समूह मकवानपुरको दोस्रो अधिवेशनको शनिबार हेटौडामा उद्घाटन गर्दै उनले कर्मचारी आउन नमानेका कारण प्रदेशसभा संचालनमा कठिनाई भईरहेको बताईन् । उनले सभामुख र उपसभामुख दुबैले कर्मचारी खोज्दै सिंहदरबार धाउनु परेको गुनासो गरिन् । प्रदेशको राजधानी र नामकारणको काम यथाशिघ्र टुंग्याउनुपर्नेमा जोड दिंदै उनले यो अन्यौलताले पनि कर्मचारी आउन आनाकानी गरिरहेको बताईन् ।

उनले दक्ष जनशक्ति अभावले संसद अघि बढ्न नसकेको भन्दै यसतर्फ संघीय सरकारले गम्भिरतापूर्वक चासो दिनुपर्नेमा जोड दिईन् । ऐन कानून निर्माणको चाप रहेको भन्दै यथाशिघ्र प्रदेशसभा बैठक संचालन गर्नुपर्ने उनको भनाई थियो । उनले राष्ट्रपति र उपराष्ट्रपतिको निर्वाचनपछि बैठक बोलाउने बताउँदै सबैको सहयोगमा मात्रै प्रदेश सरकारले काम गर्न सक्ने बताईन् ।

कार्यक्रममा ३ नम्बर प्रदेश नेकपा माओवादी संसदीय दलका उपनेता कुमारी मोक्तान, प्रदेशसभा सदस्य ओम घलान, भीमफेदी गाउँपालिकाका अध्यक्ष हिदम लामा, १२ नम्बर वडाका वडाध्यक्ष ललित घलान, नेपाल पत्रकार महासंघका अध्यक्ष हरि हुमागाई, तामाङ सञ्चार समूहका केन्द्रीय महासचिव विष्णु मोक्तान, नेपाल तामाङ घेदुङ संघ मकवानपुरका अध्यक्ष लिलाराज घलान, शक्ति समूहका अस्मिता तामाङ लगायतले मन्तव्य व्यक्त गरेका थिए ।

समूह मकवानपुरकी अध्यक्ष दुदुमाया सिन्तानको सभाध्यक्षतामा भएको अधिवेशनमा उपसभामुख राधिका तामाङ, प्रदेशसभा सदस्य कुमारी मोक्तान, ओम घलान, भिमफेदी गाउँपालिका अध्यक्ष हिदम लामा, इन्द्रसरोवर गाउँपालिका अध्यक्ष जीवन लामा, कैलाश गाउँपालिका अध्यक्ष टंक मोक्तान र बाग्मती गाउँपालिका अध्यक्ष सर्केश घलानलाई सम्मान गरिएको थियो ।