चुरियामाईमा भएको दुर्घटनामा गम्भीर ४ मध्ये २को मृत्यु

१५ असोज, हेटौंडा। बुधबार बिहान पुर्व पश्चिम राजमार्ग अन्तर्गत मकवानपुर र बाराको सिमाना जितपुर सिमरा उपमहानगरपालिका वडा नम्बर २२ चुरियामाई मन्दिरको उकालोमा भएको दुर्घटनामा गम्भीर घाइते ४ मध्ये २ जनाको मृत्यु भएको छ।

बुधबार बिहान जनकपुरबाट काठमाडौँतर्फ जाँदै गरेको ना ७ ख ८५३७ नम्बरको यात्रुबाहक बस जितपुर सिमरा उपमहानगरपालिका–२२ चुरियामाई मन्दिर नजिक उकालोमा   ब्रेक फेल भई पछाडि सर्दा बसले सोही दिशातर्फ जाँदै गरेका ना १२ प ३३६० र म।प्र। ०३–०२४ प ४४९५ नम्बरका दुई मोटरसाइकललाई किचेको थियो ।बसले किच्दा दुबै मोटरसाइकलमा सबार बारा भरवलिया गाउँ बस्ने २५ वर्षीय मकेश्वर पटेल, २२ वर्षीया कलिता देवी, २० वर्षीया तानेया पटेल,२७ वर्षीय कञ्चन कुमार पटेल । त्यस्तै २६ वर्षीया कविता देवी र ३ वर्षीय बालक आयुष पटेल गम्भिर घाइते भएका थिए।

गम्भीर घाइते मध्ये  बारा फेटा गाउँपालिका–१ भरवलियाका २५ वर्षीय मकेश्वर पटेल र पर्सा वीरगञ्ज महानगरपालिका–३१ बस्ने २६ वर्षीया कवितादेवीको मृत्यु भएको बारा प्रहरी प्रवक्ता डीएसपी विजयराज पण्डितले जानकारी दिएका छन्।उपचारका लागि उनीहरूलाई कलैया प्रादेशिक अस्पतालतर्फ लैजाने क्रममा बाटोमै मृत्यु भएको जनाइएको हो । अन्य घाइते २ जनाको हेटौंडा स्थित मकवानपुर सहकारी अस्पतालमा उपचार भइरहेको छ। 
यता दुर्घटनापछि फरार बस चालकलाई प्रहरीले नियन्त्रणमा लिइसकेको जनाएको छ ।