ठाउँ ठाउँमा पहिरो जाँदा काठमाडौं हिडेका सवारीलाई हेटौंडामै 'होल्ड'

चौकिटोलमा होल्डमा राखिएका सवारीहरू

१९ असोज, हेटौंडा। हेटौंडाबाट बैकल्पिक मार्ग हुदै काठमाडौँ हिडेका हजारौं सवारीलाई शनिबार साँझ देखिनै हेटौंडामा होल्ड गराइएको छ।

हेटौंडा हुदै काठमाडौँ जाने कुलेखानी - फाखेल, कुलेखानी सिस्नेरी र कान्तिलोकपथ सडकखण्डमा पहिरो खस्न सक्ने सम्भावनालाई मध्यनजर गरेर अत्यावश्यक बाहेकका सवारीलाई होल्डमा राखिएको छ । हेटौँडा १चौकीटोल, बुद्धचोक चौघडा लगायतका स्थानमा सवारीलाई होल्डमा राखिएको मकवानपुरका प्रहरी प्रवक्ता प्रहरी नायब उपरीक्षक पुष्कर बोगटीले जानकारी दिएका छन्। यता शनिबारको अविरल वर्षाका कारण भिमफेदी देखि सिमखोला र सिमखोला देखी फाखेल सडकखण्डमा दर्जनौ स्थानमा पहिरो खसेको प्रहरीले जनाएको छ । अहिले पानी पर्ने क्रम रोकिएको र पहिरो हटाएपछि अत्यावश्यक  सवारीलाई मात्र गन्तव्यमा पठाइने प्रहरी प्रवक्ता डिएसपी बोगटीले जानकारी दिएका छन्।पहिरो पन्छयाउन हेव्वी इक्यूपमेन्ट पहिरोगस्त स्थानमा पठाइसकेको र  पानी नपरे पहिरो नखसे ३देखी ४ घण्टा भित्र फाखेल सडकखण्ड संचालन ल्याइने डिएसपी बोगटीले जानकारी दिएका छन्। यता मकवानपुरका प्रजिअ स्किम श्रेष्ठले सुरक्षाकर्मीको टोली पहिरोगस्त क्षेत्रको अनुगमनमा जाने, पहिरोगस्त क्षेत्रको अवस्था, सडकको अवस्था र काठमाडौं  प्रशासनले रोकिएका सवारीलाई पठाउन आदेश दिएपछि मात्र होल्ड गरिएका सवारी संचालन गरिने बताइन ।

अहिले हेटौंडाबाट धरान चतरा, हेटौंडा - नारायणगढ सडकखण्ड मात्र संचालनमा रहेका छन्।