फुटसलको उपाधी एनआईसी एसियालाई

२६ फागुन, हेटौँडा । न्हुच्छे–गोविन्द स्मृति अन्तरबैंक फुटसल प्रतियोगिताको उपाधी एनआईसी एसिया बैंकले जितेको छ । शनिबार भएको फाइनल खेलमा सडन डेथमा सनराईज बैंकलाई पराजित गर्दै नगद ५० हजार राशीसहित एनर्आसी एसियाले उपाधी जितेको हो । 
उपविजेता सनराइज बैंकले २५ हजार रुपैयाँ हात पा¥यो । फाइनल खेलमा निर्धारित समय १–१ गोलको बराबरी भएपछि खेल टाइब्रेकरमा पुगेको थियो । टाईब्रेकरमा ३–३ प्रहारमा दुबै टिमले २–२ गोल गरेपछि खेल सडन डेथमा पुगेको हो । सडन डेथमा एनआईसी एसियाका निश्चल बस्नेतले निर्णायक गोल गर्दै उपाधी जिताए ।

यस्तै प्रतियोगिताकै उत्कृष्ट खेलाडी एनआईसी एसियाका अरुणकुमार महतो घोषित भए । महतोलाई सेञ्चुरी बैंकको हेटौंडास्थित क्षेत्रीय कार्यालयका प्रबन्धक लालबहादुर थिङले नगद ५ हजार रुपैयाँ पुरस्कार प्रदान गर्नुभयो । सेमीफाइनल खेलमा नेपाल इन्भेष्टमेन्ट बैंकलाई पराजित गर्दै सनराइज बैंक फाइनल प्रवेश गरेको थियो भने उपाधी विजेता एनआईसी एसियाले एनएमबी बैंकलाई २–१ गोलअन्तरमा पराजित गर्दै फाइनल प्रवेश गरेको थियो । बैंकहरुबीच आपसी सद्भाव र भाईचारा विकास गर्ने उद्देश्यले बीजी कन्सल्टेन्सी प्रालिले प्रतियोगिताको आयोजना गरेको हो ।

बीजी कन्सल्टेन्सी प्रालिका कार्यकारी निर्देशक विष्णुगोपाल महर्जनले आफ्ना मातापीताको स्मृतिमा गत वर्षदेखि प्रतियोगिता आयोजना गरेका थिए ।