मेयर कप फुटबलः फाइनलमा ९ नम्बर र १० नम्बर भिडने

२७ फागुन, हेटौँडा । हेटौंडामा जारी मेयर कप फुटबल–२०७४ को उपाधिको लागि ९ नम्बर वडाको कुष्माण्ड फुटबल टिम र १० नम्बर वडाको भूटनदेवी माता फुटबल टिम भिड्ने भएका छन् ।
आईतबार सम्पन्न सेमीफाइनल खेलमा भूटनदेवी टिमले १६ नम्बर वडा र कुष्माण्ड टिमले २ नम्बर वडाको वनस्खण्डी टिमलाई हराउँदै फाइनल भिडन्त पक्का गरेका हुन् । 
पहिलो सेमीफाइनलमा भूटनदेवी टिमले १६ नम्बर वडालाई ४–० गोल अन्तरले हराएको हो । एकपक्षीय खेलमा भूटनदेवी माता टिमको जितको लागी सुरज बिष्ट, रिजन लामा, सुशान्त लामा र सुमन छुमीले एक एक गोल गरे । 
खेलको म्यान अफ दी म्याच भूटनदेवी टिमका मिडफिल्डर विवेक गुरुङ भए । उनले भ्वाइस अफ यूथ चौकिटोल हेटौंडाको तर्फबाट नगद एकहजार रुपैंयासहित म्यान अफ दी म्याचको प्रमाणपत्र प्राप्त गरे ।
यस्तै आइतबार नै भएको दोस्रो सेमीफाइनलमा २ नम्बर वडाको वनस्खण्डी टिम विरुद्व १–० को कठिन जित निकाल्दै ९ नम्बर वडाको कुष्माण्ड टिम विजयी भयो । दोश्रो खेलमा कुष्माण्ड टिमका फरवर्ड अमिर श्रेष्ठ नायक भए । उनले खेलको २१ औँ मिनेटमा गरेको गोल नै निर्णायक बन्यो । 
खेलको म्यान अफ दी म्याच बनेका श्रेष्ठले भ्वाइस अफ यूथ चौकिटोल हेटौंडाको तर्फबाट नगद एकहजार रुपैंयासहित म्यान अफ दी म्याचको प्रमाणपत्र प्राप्त गरे । 
मेयरकप फुटबलको फाइनल भिडन्त पर्सी मङ्गलबार दिउँसो हुने छ । हेटौंडा उपमहानगरपालिकाको आयोजना तथा मकवानपुर जिल्ला खेलकुद विकास समितिको व्यवस्थापनमा सञ्चालन भैरहेको प्रतियोगिताको विजेता र उपविजेता टिमले क्रमश ः नगद एकलाख ५० हजार र ७५ हजार रुपैंयासहित ट्रफी, मेडल र प्रमाणपत्र प्राप्त गर्नेछ । 
यस्तै सर्वोत्कृष्ट खेलाडी र विधागत उत्कृष्ट खेलाडीलाई समेत नगद पुरस्कारको व्यवस्था गरिएको छ ।