मकवानपुरको धेरै क्षेत्र डढेलोको उच्च जोखिममा

२९ फागुन, हेटौँडा । वन डढेलोको हिसावले मकवानपुरको धेरै क्षेत्र उच्च जोखिममा रहेको जिल्ला वन कार्यालय मकवानपुरले जनाएको छ । मकवानपुरका वन क्षेत्रमध्ये बढि भाग डढेलोको हिसावले अति संवेदनशिल रहेको कार्यालयले जनाएको हो ।

कार्यालयले डढेलोको जोखिमको आधारमा जिल्लालाई ३ भागमा बाँडेको छ । कार्यालयका अनुसार अति संवेदनशिल क्षेत्रमा साविकको राईगाउँ, धियाल, फापरवारी, श्रीपुरछतिवन, चुरियामाई, सरिखेत पलाँसे, बसामाडि, काँकडा, भैसे, पालुङ, डाँडाखर्क, आग्रा, टिष्टुङ, गोगने, चित्लाङ, बज्रबाराही, फाखेल, सिस्नेरी, कोगटे, इपा पञ्चकन्या गाविस रहेका छन् भने हटिया, हर्नामािड, नामटार, मनहरी गाविस र निकुञ्जका आंशिक क्षेत्र अति संवेदनशिलमा छन् ।

कालिकाटार, भार्ता, दामन संवेदनशिल र कुलेखानी, मार्खु गाविसका आंशिक क्षेत्र, फापरवारी, श्रीपुर छतिवन, हर्नामाडि, आग्रा, गोगनेको केही क्षेत्र डढेलोको जोखिमका दृष्टिकोणले कम संवेदनशिल रहेका छन् । जोखिमका आधारमा सम्बन्धित वन इकाईमार्फत पूर्व सावधानी र डढेलो नियन्त्रणका लागि रणनीति बनाईएको वन कार्यालयको भनाई छ । सुख्खायाम शुरु भएसंगै मकवानपुरका वनमा डढेलोको जोखिम बढेकोले वन डढेलोको अवस्थालाई बर्गिकरण गर्दै वन कार्यालयले डढेलोको जोखिम न्यूनिकरणका लागि अभियान थालेको हो ।

कार्यालयले डढेलोको नियन्त्रणका लागि सामग्री वितरणसंगै डढेलोको नकारात्मक प्रभावबारे सचेतना कार्यक्रम संचालन गरिरहेको जिल्ला वन कार्यालय मकवानपुरका सहायक वन अधिकृत विशाल भट्टराईले बताए । कार्यालयले समुदायमा आधारित वन व्यवस्थापन पद्धति अवलम्बन गरी डढेलोको संवेदशिलताको आधारमा वन संरक्षणको काम गरिरहेको उनले बताए । सामुदायिक वन, सुरक्षा निकाय, सरकारी एवं गैरसरकारी निकायहरुका प्रतिनिधिहरुलाई तालिम समेत प्रदान गरेको वन कार्यालयले जनाएको छ ।

१ लाख ४४ हजार ५ सय ५८ वन क्षेत्र रहेको मकवानपुरमा ४ सय १९ सामुदायिक वन रहेको छ ।