पशुपतिको स्वर्ण महोत्सवः मनहरीका अध्यक्षद्धारा विद्यार्थीलाई पोसाक

८ मंसिर, हेटौँडा । मकवानपुरको मनहरी गाउँपालिकाका अध्यक्ष रंजन कालाखेतीले आफूले प्राप्त गर्ने सेवा सुविधापतको रकमबाट मनहरीकै एक विद्यालयका विद्यार्थीहरुलाई विद्यालय पोसाक सहयोग गरेका छन् । पालिका अध्यक्ष कालाखेतीले मनहरी वडा नम्बर ४ मा रहेको पशुपति मा विका २३ जना विपन्न तथा दलित विद्यार्थीहरुलाई  पोसाक सहयोग गरेका हुन् । 
मसिने मा रहेको पशुपति मा विको आजबाट सुरु भएको  स्वर्ण महोत्सव कार्यक्रम उद्घाटनका क्रममा अध्यक्ष कालाखेतीले ४३ हजार मूल्य बराबरको पोसाक वितरण गरेका हुन् । विद्यालयले विपन्न विद्यार्थी पहिचान गरि सिफारिस गरेबमोजिम आफ्नो तलब भत्ताको रकमबाट उक्त सहयोग गरिएको अध्यक्ष कालाखेतीले बताएका छन् । २०७९ सालमा अध्यक्ष निर्वाचित हुँदै गर्दा कालाखेतीले आफूले पाउने तलब भत्ता विपन्न गाउँबासीका लागि खर्च गरिने उद्घोष गरेका थिए । सोही उद्घोषबमोजिम उनले मनहरी ५ मा एक विपन्न एकल महिलाको घर निर्माण गरिसकेका छन् भने ६ नम्बर वडामा पनि घर निर्माणको काम चलिरहेको छ ।

पशुपति माविले स्वर्ण महोत्सवका अवसरमा आयोजिक सप्ताहव्यापी कार्यक्रम सोमबार अध्यक्ष कालाखेतीले विद्यालय प्राङ्गणमा झन्डोत्तोलन गरी उद्घाटन गरेका हुन् । संवरण महोत्सवको उद्घाटनसँगै विद्यार्थीहरुबीच चम्चा दौड, बोरा दौडलगायतका प्रतियोगिता गरिएको छ।विभिन्न कार्यकम गरि मंसिर १५ गते बागमती प्रदेशका मुख्यमन्त्री ईन्द्रबहादुर बानियाँद्धारा समापन गरिने विद्यालय व्यवस्थापन समिति अध्यक्ष माधव गौतमले जानकारी दिए । विव्यस अध्यक्ष गौतमको अध्यक्षतामा भएको उद्घाटन कार्यक्रममा गाउँपालिका अध्यक्ष कालाखेतीको प्रमुख आतिथ्यता रहेको थियो ।कार्यक्रममा मनहरी ४ का वडाध्यक्ष प्रकाश थापा, ९ नम्बर वडाध्यक्ष राजकुमार श्रेष्ठ, विद्यालयका पूर्व अध्यक्ष पवन खड्कालगायतको आतिथ्यता रहेको थियो ।