३ नम्बर प्रदेशको बजेट चैत २० भित्र आउने

१ चैत, हेटौँडा । ३ नम्बर प्रदेश सरकारले चैत २० गतेभित्र चालु आर्थिक बर्षका लागि बजेट ल्याउने भएको छ । 
विहिबार अबेर सम्पन्न मन्त्रीपरिषद बैठकपछि सरकारका प्रवक्ता एवं आर्थिक मामिला तथा योजना मन्त्री कैलाश ढुंगेलले चैत २० गतेभित्र चालु आवका लागि बजेट एवं नीति तथा कार्यक्रम ल्याउने जनाएका हुन् । उनले आगामी आर्थिक बर्षको बजेट एवं नीति तथा कार्यक्रम असार १ गते ल्याउने गरी तयारी गरेको जानकारी दिए ।
विहिबारको मन्त्रीपरिषद बैठकले सरकारको प्रवक्ताको जिम्मेवारी ढुंगेललाई दिने निर्णय गरेको छ । बैठकले स्थानीय तहका पदाधिकारीहरुको सेवा सुविधा, प्रदेश सरकारका केही सार्वजनिक लिखत प्रमाणिकरणसम्बन्धी विद्येयक २०७४ पारित, आर्थिक कार्यविधिसम्बन्धी विद्येयक, प्रदेशसभाका पदाधिकारी तथा सदस्यहरुको सुविधासम्बन्धी विद्येयक निर्माणका लागि सैद्धान्तिक सहमति दिने निर्णय गरेको ढुंगेलले जनाए ।

स्थानीय तहका पदाधिकारीले पाउने सुविधा यस्तो छ

महानगरपालिकाका मेयर - ४६ हजार, उपमेयरले ४० हजार २ सय र वडाध्यक्षले २८ हजार पाउनेछन् । यस्तै उपमहानगरका मेयरले ४० हजार २ सय, उपमेयरले ३५ हजार र वडाध्यक्षले २५ हजार पाउनेछन् ।

नगरपालिकाका मेयरले ३५ हजार, उपमेयरले ३१ हजार र वडाध्यक्षले २२ हजार तलब पाउनेछन् । गाउँपालिकाका अध्यक्षले ३१ हजार पाउनेछन् भने उपाध्यक्षले २७ हजार र वडाध्यक्षले २० हजार पाउनेछन् । स्थानीय तहका पदाधिकारीको सेवा सुविधा संसदबाट पारित गरेपछि लागु हुने जनाईएको छ ।