जिविकोपार्जन पुर्नउत्थान परियोजनाको अनुगमन

२ चैत,हेटौडा । भुकम्पपीडित महिलाहरुको आर्थिक अवस्थालाई सबल बनाई जिविकोपार्जनमा सहयोग पु¥याउने उदेश्यले सञ्चालित मकवानपुर जिविकोपार्जन पुर्नउत्थान परियोजनाको अनुगमन गरिएको छ । नारीसिप सृजना केन्द्र र अक्सफाम नेपालको साझेदारिमा सञ्चालित परियोजनाको सरोकारवालाको टोलीले अनुगमन गरेको हो ।

सन् २०१७ अप्रिलबाट शुरु गरिएको परियोजनाको २०१८ मार्चसम्म भएका परियोजनाको क्रियाकलापको सरकारी निकायका प्रतिनिधी तथा जनप्रनिधिसहितको टोलीले अनुगमन गरेको थियो । 

मकवानपुरको ईन्द्रसरोवर गाउँपालिका वडा नम्बर १ मार्खु, २ कुलेखानी, ३ सिस्नेरी, ४ र ५ फाखेल, थाहानगरपालिका वडा नम्बर ९ र १० चित्लाङ, भिमफेदी गाउँपालिका वडा नम्बर ९, कैलाश गाउँपालिका वडा नम्बर ९ र १० नामटार, वडा नम्बर ३ र ४ कालिकाटार, वडा नम्बर ७ र ८ भार्तामा परियोजना सञ्चालित छ ।

परियोजना अन्तरगत खानेपानी, सिंचाई, तरकारी संकलन केन्द्र, सहकारीमा सञ्चालित कृषक सहायता केन्द्र, सहकारी, नेट फार्मिङ, ईन्द्रसरोवर कृषि सहकारीका संस्थाबाट तयार गरिएको माछाको केज लगायत अनुगमन गरी छलफल तथा अन्र्तक्रिया समेत गरिएको थियो ।

जिल्ला समन्वय समिति मकवानवपुरकी उपाध्यक्ष भगवति पुडासैनीले भौतिक पूर्वाधार निर्माण सहितको परियोजनाले गाउँलेमा उत्साह आएको बताईन् । संस्था र स्थानीय तहको संयुक्त लगानीमा निर्मित पूर्वाधार तथा कृषि औजार वितरणले स्थानीय लाभान्वित भएको भन्दै उनले सचेतना अभियानसँगै भौतिक निर्माण कार्य प्रभावकारी पाईएको प्रतिक्रिया दिईन् ।

अनुगमन टोलीमा जिल्ला प्रशासन कार्यालयका लक्ष्मण बिडारी, जिल्ला पशु सेवा कार्यालयका डा. भरत रेग्मी, अक्सफाम नेपालका श्याम पौडेल, सम्बन्धित वडाका वडा अध्यक्षहरु जमानसिँह वाइवा, राजुमान महर्जन, नारीसिप सृजना केन्द्रकी अध्यक्ष उमा सुवेदी, कार्यक्रम प्रबन्धक चिरञ्जीवि पौडेल फिल्ड संयोजक गणेश चालिसे, गाउँपालिका कृषि कार्यालयका रामपुकार शाह, कुमार पौडेल लगाएतको सहभागिता रहेको थियो ।