फुर्केचौरमा वन डढेलोबारे सचेतना गोष्ठी

६ चैत, हेटौँडा । वनलाई कसरी डढेलो बाट बचाउन सकिन्छ भन्ने विषयमा जानकारी गराउने उद्धेश्यले हर्नामाडीमा एक दिने डढेलो सचेतना गोष्ठीको आयोजना गरिएको छ ।
जिल्ला वन कार्यालय मकवानपुरको आयोजनामा गोष्ठी भएको हो । गोष्ठीमा जिल्ला वन अधिकृत प्रल्हाद प्रसाद धितालले सबैको सामुहिक प्रयासबाट मात्र वनलाई डढेलोबाट बचाउन सकिने भएकाले सबै उपभोक्ताहरु सक्रिय हुनु पर्नेमा जोड दिए । गोष्ठीमा फापरवारी सेक्टर वन कार्यालयका प्रमुख राजेन्द्रमान राजभण्डारी,जिल्ला वन कार्यालयका सहायक वन अधिकृत ऋषिराम पराजुलीले सहजकिरण गरेका थिए ।
सहभागीहरु विच सुख्खायाममा वनजंगलमा डढेलोको प्रकोपले व्यापक विनास गर्ने भएकाले यसबाट कसरी जंगललाई बचाउन सकिन्छ भन्ने विषयमा छलफल गरिएको थियो । गोष्ठीमा डढेलो नियन्त्रणबारे स्थलगत अभ्यास समेत गरिएको थियो । गोष्ठीमा सहायक वन अधिकृत, फरेष्टर, वनरक्षक, संचारकर्मी र उपभोक्ताको सहभागिता रहेको थियो ।
यता, हेटौडा–५ मा रहेको पिप्लेपोखरा सामुदायिक वनमा लागेको डढेलो २ घण्टा पछि नियन्त्रमा आएको छ । सिंचाईकुनादेखि मनकामना जाने बाटोमा लागेको आगो वनका कर्मचारी, प्रहरी, छिमेकी, सामुदायिक वनका उपभोक्ता र स्थानीय उपभोक्ताहरुको सहयोगमा निभाईएको हेटौडा ईलाका वन कार्यालयका फरेष्टर यदुकुमार घिमिरेले जानकारी गराए ।