नेपाली राष्ट्रिय फुटबल टोलीलाई विदाई

९ चैत, हेटौँडा । एएफसी एसियन कप छनोटअन्तर्गत समूह चरणको अन्तिम खेल खेल्न कतारको दोहा जान लागेको राष्ट्रिय फुटबल टोलीलाई शुक्रबार विदाई गरिएको छ । यही चैत १३ गते दोहामा हुने यमनविरुद्धको दोस्रो लिग खेल्न जाने नेपाली टोलीलाई सफलताको शुभकामना दिँदै अखिल नेपाल फुटबल संघले बिदाइ गरेको हो । 
नेपाली टोलीमा गोलकिपर बिकेश कुथू, किरण चेम्जोङ र एलन न्यौपाने, डिफेन्डरमा अनन्त तामाङ, विराज महर्जन, रजिन धिमाल, आदित्य चौधरी, दिनेश राजवंशी र देवेन्द्र तामाङ, मिडफिल्डरमा सुजल श्रेष्ठ, अन्जन विष्ट, रोहित चन्द, विशाल राई, सुनील वल, हेमन गुरुङ र हेमन्त थापा मगर तथा स्ट्राइकरमा विमल घर्ति मगर, सुमन लामा, नवयुग श्रेष्ठ र जर्जप्रिन्स कार्की रहेका छन् । टोलीको मुख्य प्रशिक्षक योतुकु कोजी, प्रशिक्षक राजुकाजी शाक्य र गोलकिपर प्रशिक्षक उज्ज्वल मानन्धर छन् । नेपाली टोली आइतबार त्यसतर्फ प्रस्थान गर्नेछ ।
यसअघि, काठमाडौंमा नेपालले यमनसँग गोलरहित बराबरी खेलेको थियो । छनोट खेलमा पाँच खेल खेलेको नेपालले दुई खेलमा बराबरी खेलेको छ । दुई अंक जोडेको नेपालका लागि उक्त खेल प्रतिष्ठाका लागिमात्र हुनेछ । समूह ‘एफ’मा रहेको नेपाल यसअघि नै समूह चरणबाटै बाहिरिइ सकेको छ ।