२ नम्बर प्रदेशमा रहेको कुप्रथा अन्त्य जरुरी : मन्त्री यादव

११ चैत, हेटौँडा । २ नम्बर प्रदेशका भूमि व्यवस्थापन, कृषि तथा सहकारी राज्यमन्त्री योगेन्द्रप्रसाद यादवले २ नम्बर प्रदेशमा रहेको दाईजो जस्ता कुप्रथाको अन्त्यका लागि सबै एकजुट हुनुपर्नेमा जोड दिएका छन् । 

नेपाल यादव सेवा समिति मकवानपुरको पाँचौं बार्षिक साधारणसभामा बोल्दै मन्त्री यादवले अशिक्षितमात्रै नभई शिक्षित परिवारमा पनि दाईजो जस्ता कुप्रथा व्याप्त रहेको भन्दै प्रदेश र जनताको हितका लागि पनि यस्तो प्रथाको अन्त्य जरुरी रहेको बताए । उनले यादव सेवा समाज जस्ता संस्थाहरुले आफनो जातीय पहिचानका लागि मात्रै नभई सामाजिक र कल्याणकारी काममा पनि अघि बढ्नुपर्ने सुझाव दिए । उनले नेपाल निर्माणका क्रममा यादव समुदायको ठूलो योगदान रहेको भन्दै मधेशको हितका लागि पनि जुट्नु जरुरी रहेको बताए । 

समितिका जिल्ला उपाध्यक्ष शिवदयाल यादवको सभाध्यक्षतामा भएको कार्यक्रममा हेटौँडा १ नम्बर वडा अध्यक्ष सविन न्यौपाने, हेटौँडा ४ नम्बर वडा अध्यक्ष नविन सिग्देल, संघीय समाजवादी फोरम रौतहटका नेता सर्पलाल यादव, समितिका सल्लाहकार रामनरेश यादव, हेटौँडा दुग्ध वितरण आयोजनाका प्रमुख गणेशलाल यादव, समितिका सचिव योगन्द्र यादव, सहसचिव दिपेन्द्र यादव, सदय नागेन्द्र राय यादव लगायतले मन्तव्य व्यक्त गरेका थिए ।