काँग्रेस मकवानपुरमा ७ जिल्ला सदस्य मनोनित

१ असोज, हेटौँडा । नेपाली काँग्रेस मकवानपुरमा शनिबार ७ जना जिल्ला सदस्य मनोनित भएका छन् । नेपाली काँग्रेसको विधान अनुसार जिल्ला सभापति इन्द्रबहादुर बानियाँले ७ जना जिल्ला सदस्य मनोनित गरेका हुन् । 
मनोनित जिल्ला सदस्यमा मकवानपुर क्षेत्र नम्बर १ बाट शेरबहादुर लामा र गोपि अधिकारी, क्षेत्र नम्बर २ बाट सूर्यबहादुर रुम्बा र कृष्णभक्त श्रेष्ठ, क्षेत्र नम्बर ३ बाट इन्दिरा न्यौपाने र क्षेत्र नम्बर ४ बाट राजकुमार मल्ल र बलराम प्रजा (चेपाङ) रहेका छन् । क्षेत्र नम्बर ३ बाट सुनिल दाहाल यसअघि नै जिल्ला सदस्य मनोनित भईसकेका छन् । 
त्यसैगरी, जिल्ला कार्यसमितिको सल्लाहकारमा दामोदर सुवेदी, अशोक शाक्य, उमा दाहाल, जयराम लामिछाने, र प्रभातकुमार दाहाललाई मनोनित गरिएको सभापति बानियाँले जानकारी दिए । विधान अनुसार जिल्ला सभापतिले प्रत्येक निर्वाचन क्षेत्रबाट २ जनाका दरले ८ जना जिल्ला सदस्य मनोनित गर्न सक्ने काँग्रेसको विधानमा प्रावधान छ । 
त्यसैगरी, जिल्ला सभापति चयन गर्न सक्ने १० जना आमन्त्रित जिल्ला सदस्य भने चयन गर्न बाँकी रहेको छ । यसलाई समेत छिट्टै पूर्णता दिईने सभापति बानियाँले बताए । छनौट हुन बाँकी रहेको ३ पदाधिकारी आइतबार चयन गरिने भएको छ । जिल्ला कार्यसमिति बैठकले उपसभापति, सचिव र सहसचिवको जिम्मेवारी तोक्ने जनाईएको छ ।
२०७२ माघ २५ गते जिल्ला अधिवेशनबाट जिल्ला कार्यसमितिमा प्रत्येक निर्वाचन क्षेत्रबाट ६/६ जना गरी २४ जना जिल्ला सदस्य, सभापति, सचिव र कोषाध्यक्ष गरी २७ जना अधिवेशनबाट निर्वाचत भएका थिए ।