अन्तिम खेलमा नेपाल यमनसँग पराजित

१४ चैत्र, हेटौँडा । एफसी एसियन कप छनोट प्रतियोगिताको अन्तिम खेलमा नेपाल यमनसँग पराजित भएको छ । 
कतारको दोहा स्थित सुहेम विन हमाद रंगशालामा भएको मंगलबार राति भएको खेलमा नेपाल यमनसँग २–१ ले पराजित भएको हो । जितसँगै यमनले भने अर्को बर्ष युएईमा हुने एएफसी एसियन कपमा स्थान सुरक्षित गरेको छ । 
समूह एफबाट फिलिपिन्स समुहको विजेता र यमन उपविजेता बन्दै एसियन कपमा छनोट हुँदा नेपाल र ताजिकिस्तान भने बाहिरिएका छन् । 
मंगलबारको खेलमा यमनले लिएको सुरुवाती अग्रतामा नवयुग श्रेष्ठले गोल गरेपछि पहिलो हाफ १–१ गोलको बराबरीमा रोकिएको थियो । 
२४ औं मिनेटमा अब्दुलेवासिया अल मातारीले गोल गर्दै यमनलाई अग्रता दिलाएका थिए । तर पहिलो हाफको इज्युरी समयमा नवयुग श्रेष्ठले गोल गर्दै खेल बराबरीमा पु¥याएका थिए । 
दोश्रो हाफको ८३ औं मिनेटमा विराज महर्जनले यमनका खेलाडीलाई डिबक्स भित्र फाउल गरेपछि यमनले पेनाल्टी पायो । सो पेनाल्टीलाई सदुपयोग गर्दै मातरीले व्यक्तिगत दोश्रो गोल गरेपछि यमन नेपाल विरुद्ध २–१ ले विजयी भयो । 
यस अघि नेपालमा भएको खेलमा भने नेपालले यमनसँग बराबरी गर्दै  अंक बाडेको थियो ।
फोटोः गोल नेपाल डट कम