मन्त्रीपरिषद बैठक सेवा सुविधामा केन्द्रित

२० चैत, हेटौँडा । ३ नम्बर प्रदेश मन्त्री परिषद बैठक मंगलबार सम्पन्न भएको छ । बैठकले केही विधेयक निर्माणका लागि सैद्धान्तिक सहमति दिएको छ भने एउटा बोर्ड गठन गर्ने सैद्धान्तिक सहमति दिएको छ ।
सरकारका प्रवक्ता आर्थिक मामिला तथा योजना मन्त्री कैलाशप्रसाद ढुंगेलका अनुसार बैठकले मन्त्रीहरुको पारिश्रमिक एवं सेवा सुविधा सम्बन्धी व्यवस्था गर्न वनेको ऐन २०७४ को विधेयक मस्यौदालाई सैद्धान्तिक सहमति दिईएको छ । त्यस्तै, प्रदेशसभा सदस्यको सेवा सुविधासम्बन्धी व्यवस्था गर्न बनेको ऐन २०७४ को विधेयक मस्यौदालाई सैद्धान्तिक सहमति दिईएको छ ।
बैठकले प्रादेशिक दुग्ध विकास बोर्ड २०७४ गठन गर्ने सम्बन्धी सद्धान्तिक सहमति गरेको छ भने प्रदेशसभा सचिवको काम, कर्तव्य, अधिकार र सेवा सुविधा सम्बन्धी अवधारणालाई सैद्धान्तिक सहमति दिएको प्रवक्ता ढुंगेलको भनाई छ । मन्त्रीपरिषद बैठकले सेवा सुविधासम्बन्धी विधेयकलाई मात्रै प्राथमिकता दिंदा विभिन्न मन्त्रालयहरुले कानून अभावमा काम अघि बढाउन सकेको छैन ।
अहिलेसम्म ३ नम्बर प्रदेशसभाले २ वटा विधेयकमात्रै पारित गरेको छ । यसअघिको प्रदेशसभाले केही सार्वजनिक लिखत प्रमाणिकरण सम्बन्धी विधेयक र आर्थिक विधेयकमात्रै पारित गरेको छ ।