काँग्रेस जिल्ला उपसभापतिमा लामिछाने र सचिवमा कठायत

२ असोज, हेटौँडा । नेपाली काँग्रेस मकवानपुरको उपसभापतिको जिम्मेवारी विष्णुप्रसाद लामिछानेलाई दिईएको छ । आइतबार बसेको जिल्ला कार्यसमिति बैठकले जिल्ला सदस्य रहेका लामिछानेलाई उपसभापतिको जिम्मेवारी दिएको हो । 
बैठकले जिल्ला सचिवमा जिल्ला सदस्य रहेका आनन्द कठायतलाई जिम्मेवारी दिएको छ । त्यसैगरी, जिल्ला सदस्य प्रदीप कोइरालालाई प्रवक्ता एवं नेविसंघ र तरुण दल विभाग प्रमुखको जिम्मेवारी दिएको छ । बैठकले अमिक परियारलाई आमन्त्रित सदस्य मनोनित गरेको छ ।
बैठकले जिल्ला सभापति ईन्द्रबहादुर बानियाँको संयोजकत्वमा ११ सदस्यीय कार्यसम्पादन समिति गठन गरेको छ । समितिमा उपसभापति विष्णुप्रसाद लामिछाने, सचिव बुद्ध लामा, आनन्द कठायत, कोषाध्यक्ष गोपिलाल विक, जिल्ला सदस्यहरु राजिव सुवेदी, रामबाबु बानियाँ, कृष्ण प्रसाद सञ्जेल, प्रदीप कोइराला, कृष्णप्रसाद दाहाल र मिरा स्यांतान रहेका छन् । बैठकमा सर्वमान्य नेता गणेशमान सिंहको स्मृति दिवसमा तस्विरमा माल्यार्पण र मौनाधारण गरिएको थियो । 
सभापति बानियाँको अध्यक्षतामा बसेको बैठकमा प्रमुख सल्लाहकार माइकल रामचन्द्र अर्याल, सचिव बुद्ध लामा, कोषाध्यक्ष गोपिलाल विक, सल्लाहकारहरु र जिल्ला सदस्यको सहभागिता रहेको थियो ।