गौरीटार रंगशाला अवलोकनपछि यस्तो भने धुर्मुसले

२१ चैत, हेटौँडा । हाँस्य कलाकार सिताराम कट्टेल धुर्मसुले बुधबार हेटौँडा–६ मा रहेको गौरीटार रंगशालाको अवलोकन गरेका छन् ।
अन्तराष्ट्रिय क्रिकेट रंगशाला निर्माणका लागि जग्गाको खोजि गरिरहनु भएका उहाँले गौरीटारस्थित रंगाशाला अवलोकन गरेका हुन् । गुरुयोजनासहित राष्ट्रिय खेलकुद प्रतिष्ठान निर्माणको क्रममा रहेको रंगशालाको जग्गा अवलोकन गर्न मूख्यमन्त्री डोरमणी पौडेलसहित धुर्मुसको टोली पुगेको थियो । अवलोकनपछि मूख्यमन्त्री पौडेलले आफुहरु यो रंगशालालाई खेलकुद पर्यटकीय क्षेत्रको रुपमा विकास गर्ने अभियानमा लागेकोले धुर्मुस टोलीले बनाउन लागेको क्रिकेट रंगशालालाई जग्गा उपलव्ध गराउन तयार रहेको बताए ।
२३ विगाह क्षेत्रफलमा फैलिएको रंगशालालाई प्रतिष्ठानको रुपमा विकास गरी सबै खाले विधाका खेलका प्रतियोगिता र अभ्यास संचालन गर्ने लक्ष्य सरकारले राखेर संरचनाहरु निर्माणाधिन छन् । गुरुयोजनामा क्रिकेट रंगशाला समेत रहेकाले धुर्मुसलाई जग्गा उपलव्ध कुनै कठिनाई नहुने जिल्ला खेलकुद विकास समितिले जनाएको छ । धुर्मुसले भने भौगोलिक हिसावले रंगशालाको जग्गा उपयुक्त रहेको भन्दै आईसिसीको मापदण्ड अनुसार प्राविधिक दृष्टिकोणले उपयुक्त देखिए काम अघि बढाउने बताए ।
अवलोकनका क्रममा जिल्ला खेलकुद विकास समितिका अध्यक्ष माधव तिमल्सिना, पूर्व अध्यक्ष बालकृष्ण चौलागाई, कार्यालय प्रमुख खुसराज दाहाल, वडा नम्बर ६ का अध्यक्ष अर्जुनप्रसाद चौलागाई लगायत अन्तराष्ट्रिय क्रिकेट रंगशालालाई जग्गा उपलव्ध गराउने प्रतिवद्धता व्यक्त गरेका थिए ।