हेटौंडा-१७ मा मिनी ट्रकको ठक्करबाट एकजनाको मृत्यु

८ असोज, हेटौंडा । कान्तिलोकपथ अन्तरगत हेटौंडा-१७ चुनडाँडामा मिनी ट्रकले ठक्कर दिंदा एक महिलाको मृत्यु भएको छ। मृत्यु हुनेमा स्थानीय ७२ वर्षीया जानकीमाया न्यौपाने रहेकी छिन् ।
घर अगाडि बाटो छेउमा रहेकी उनलाई ट्रकले ठक्कर दिएकोमा हेटौंडा अस्पतालमा प्रारम्भिक उपचारपछि थप उपचारका लागि काठमाडौंस्थित बीएनबी अस्पताल लगिएकोमा अस्पताल पुगेलगत्तै उनको मृत्यु भएको जिल्ला प्रहरी कार्यालय मकवानपुरले जनाएको छ ।
बुधबार बिहान सालकपार्कमा काठमाडौंबाट हेटौंडातर्फ आउँदै गरेको म.प्र.०३-००२ ख ४८२४ नम्बरको मिनी ट्रकले हेटौंडाबाट शिखरकटेरीतर्फ जाँदै गरेको बा.प्र.०३–००५ प ५००९ नम्बरको मोटरसाइकललाई ठक्कर दिएको थियो । मोटरसाइकललाई ठक्कर दिई मोटरसाइकल चालक हेटौंडा-१३ पदमपोखरीका २६ वर्षीय सागर चौलागाईं र पछाडि सवार २५ वर्षीय नारायणप्रसाद ढुंगानालाई घाइते बनाई ट्रकले करिब ५००–७०० मिटर पश्चिमतर्फ आएर न्यौपानेलाई समेत ठक्कर दिएको प्रहरीले जनाएको छ । त्यसपछि ट्रक सडक छेउ भित्तामा ठोक्किएको थियो ।
दुर्घटनामा चौलागाईंको बाँया हातमा चोट लागेको थियो भने ढुंगानाको बाँया खुट्टामा चोट लागेको थियो। दुवैको हेटौंडास्थित मोडेल अस्पतालमा उपचारपछि डिस्चार्ज गरिएको प्रहरीले जनाएको छ । प्रहरीले ट्रक चालकलाई नियन्त्रणमा लिएको छ ।