फाखेल र कुलेखानीमा ७ सय ४० महिलाको निःशुल्क स्वास्थ्य परीक्षण

२७ चैत,हेटौंडा । नेपाल अर्बुद रोग निवारण संस्थाको २५ औं वर्षको अवसर पारेर संस्थाको जिल्ला शाखा मकवानपुरले सोमबार र मंगलबार जिल्लाका दुई स्थानमा महिलाका लागि निःशुल्क स्वास्थ्य शिविरको आयोजना  गरेको छ ।

मकवापुरको  उतरी क्षेत्र फाखेल र कुलेखानीमा गरी  ७ सय ४० महिलाको परीक्षणसहित उनीहरुलाई सल्लाह र औषधी पनि निःशुल्क वितरण गरिएको जिल्ला सभापति कपिला जोशीले जानकारी दिइन् । फाखेलमा भएको शिविरमा २ महिलामा पाठेघरको मुखको क्यान्सरको जोखिम देखिएको पाइएको थियो । २२ र ३० वर्ष उमेरका महिलामा यस्तो जोखिम देखिएको थियो । 

फाखेलमा परीक्षणमा आएका महिलामध्ये ८० प्रतिशतमा पाठेघरको संक्रमण देखिएको थियो । त्यहा ३ जनामा आंग खस्ने समस्या देखियो भने पाठेघरमा मासु पलाएको ३ जनामा देखिएको सभापति जोशीले जानकारी दिइन् । १ जनामा स्तनमा संक्रमण पाइएको थियो । कुलेखानीमा भएको शिविरमा पाठेघरमा मासु पलाएका ४ जना र स्तनमा संक्रमण १ महिलामा देखिएको थियो । अधिकांशको पाठेघरमा समस्या देखिएको पाइएको छ । 

फाखेल हेल्थपोष्टमा शुरु शिविरको उद्घाटन इन्द्रसरोवर गाउपालिका अध्यक्ष जीवन लामाले गरेका थिए भने आयोजक संस्था सभापति जोशीको सभाध्यक्षतामा कार्यक्रम भएको थियो । वडा नम्बर ४ अध्यक्ष धनवीर स्यांतान, गाउपालिका प्रशासन अधिकृत शैलेन्द्र भण्डारी, सहयोगी बीपी कोइराला मेमोरिएल क्यान्सर अस्पताल भरतपुरका प्रिभेन्स डिपार्टमेन्ट प्रमुख डा. किशोर प्रधानांगलगायतले मन्तव्य व्यक्त गरेका थिए । शिविरमा ६ स्वास्थ्यकर्मीले परीक्षण गरेका थिए ।